Bteng ka 7 Wasa ban khur namjop haka Super Division ka WJDSA liem biang ka Mynthong da ka own goal

Syllad | The Rising MeghalayaSeptember 3, 2022

Ka kynhun ialehkai jong ka 7 Wasa Utd kala bteng ban khur namjop haka Super Division Football Tournament kaba pyniaid daka West Jaintia District Sports Association (WJDSA) hadien ba kala pynliem da 1-0 iaka Mynthong haka jingiakhun kaba long ha Kiang Nangbah Stadium haka sngi Saitjain.

Kane ka namjop jong ka 7 Wasa mynta ka sngi kala mih paw da ka own goal ne ka kol thep hi. Ia kane ka kol la thep da u Teibokmi Lyngdoh jong ka Mynthong haka minit kaba 43 bad kane ka kol kala neh haduh bala wai ka por iakhun.

Kane ka dei ka sien kaba ar ba ka Mynthong kala shah pynliem da ka own goal haka Super Division mynta ka aiom bad kane kala la theh umpjah iaka jingpynkhreh jong ka namar ba kam don ia katta ka bok ka nusip ban khur iaka namjop wat la kala ialehkai bha.

Da kane ka namrem ka Mynthong kala neh 7 poin na ki san sien mih madan, katba ka 7 Wasa Utd kala kiew joit sha ka 12 poin na ki saw sien iakhun.

Ka Ladthadlaboh kala kamai 9 poin na ki saw sien iakhun, ka Nangbah Mulang 7 poin.