Bitar bad pynrem jur ka MSCW ia ka jingjia shah pyniap dusmon ka samla lud ha Rilum Garo

Syllad | The Rising MeghalayaJuly 20, 2025

Ka Meghalaya State Commission for Women (MSCW) ka pynpaw ka jingkyndit, ka jingsngewsih bad ka jingbitar kaba khraw halor ka jingshah lehbor bad ka jingshah pyniap dusmon jong kawei ka samla lud ha Williamnagar.

Ka Commission ha u kyrwoh lyngba ka Kong Iamon Syiem Chairperson ka la pynrem jur da kaba tyngeh ia kane ka kam pyntriem ba shyrkhei kaba la pynkhein jur ia ka hok ba kongsan, ka burom bad ka jingshngan jong ki kynthei khynnah.

“Ngi sngewkhia jur halor ki jingeh jingjynjar kiba kane ka lanot ka la mad bad ngi pynpaw ka jingsngewlem na ka bynta kiba haiing hasem jong ka. Kiba kum kine ki kam thombor ki dei ki bym lah ban shah bad kiba pyni halor ka jingthombor beit beit ia ka jinglong ba kordor ha ka longbriew manbriew bad ka hok kaba ka imlang sahlang jong ngi ka pynskhem,” ka la ong.

Ka Commission ka la dawa ban kem mardor bad ban pynshitom da kaba tyngeh pyrshah ia une nongleh kam bymman khlem da pynslem.

Nalor kata ka kyrpad jur ruh ia ka Tnad Pulit ka Jylla bad baroh ki bor ba dei khmih ban shim kongsan ban pynlong ia ka jingtohkit halor kane ka jingjia, ban pynthikna halor ka jingkhuid jingsuba bad ban bteng ban aijingtip sha ki paidbah halor kane ka kam.

“Ngi kyntu ruh ia ki nongshong shnong, ki sengbhalang bad ki nongshong shnong kiba don ka jingsngewkhia ba kin iatreilang pura abd ki tnad tohkit khnang ban pynthikna ban pynioh  mardor ia ka jingbishar hok,” ong u kyrwoh.

Haba shim ia ka jingkhia bad ka jingkyrkieh jong ka jinglong jingman, ka Commission ka la shim da ka suomoto ha kaba iadei bad kane ka jingjia ha kaba kan buddien laitluid halor ka jingiaid jong ka jingtohkit, ban tuklar lada donkam ban pynthikna ba kiba haiing hasem jong ka lanot kin ioh ia ka jingkyrshan bad jingiarap kiba donkam, ban iatreilang bad ki tnad sorkar ban pynkhalin ia ki lad jingiada na ka bynta ki kynthei khynnah hapoh ka thain.

Ka Commission ka pynpaw biang ia ka jingkular jong ka ban pynthikna ban pynioh ia ka jingbishar hok na ka bynta kane ka lanot bad ban pynshitom ia u nongleh kam bymman.

Ka Commission ka ieng ryngkat bad kiba haiing hasem jong ka lanot kumjuh ki nongshong shnong ka Williamnagar ha kaba kum kane ka khyllipmat kaba sngewsih kthang.