Bit khlam COVID 39 ngut, pynbna micro containment zone iaka kharkhana dewbilat ha East Jaintia Hills

Syllad | The Rising MeghalayaSeptember 8, 2020

U District Magistrate jong ka East Jaintia Hills District ula pynbna micro containment zone iaka kharkhana dewbilat ka Star Cement hadien bala iabit khlam COVID-19 haduh 39 ngut na katei ka kharkhana.

Katkum ka khaiphod jong ka tnad ka koit ka khiah jong ka East Jaintia Hills ba ki don haduh 39 ngut kiba la bit khlam COVID-19 ha Star Cement bad ki dei ruh ki high risk contact ne kiba iakynduh bad uba iohkem pang nyngkong uba la test COVID-19 positive mynta ka sngi.

Ka tnad ka koit ka khiah kala kyrpad ia u District Magistor ban pynbna micro containment zone ia kane ka kharkhana ban pyndep iaka contact tracing ia kito kiba iakynduh bad kiba ioh pang COVID-19 kumjuh ban pyndep iaka Antigen test/RTPCR ia baroh ki high risk contact bad ki low risk contact.

U District Magistor da ka jingkyrpad jong ka tnad ka koit ka khiah ka district ula pynbna micro containment zone ia kane ka kharkhana bad la khang iaka jingrung jingmih klumar sha kane ka kharkhana naduh ka shiteng synia jong ka 8 tarik Nailur (September) 2020 haduh 6 baje mynstep jong ka 11 Nailur 2020.

Ki jaka kiba la khang pyrshah ban rung ban mih ki long ka Old mines office, CMCL School, Hospital, Residential areas, Driver Restroom bad ka Labour Colony.