Baroh ki don ka hok ban im bad kamai, ong u AL Hek halor ka jingkynriah nongdie madan na Khyndailad

Syllad | The Rising MeghalayaJuly 16, 2025

Haba kynthoh halor ka rai jong ka sorkar ban pynkynriah noh ia ki nongshong die madan na ka thain Khyndailad, u nongialam ka BJP bad Myntri Sorkar, u Bah AL Hek haka 15 tarik Naitung u la ban jur ba baroh ki don ia ka hok ban im bad ban kamai kajih.

“Baroh ki don ia ka hok ban im. Ki hap ban tip ruh ia ka nongrim,” ong u Bah Hek haba kren sha ki nongthoh khubor.

Haba kyntait ban kren shuh shuh halor kane ka mat, u Myntri u la ong, “Mynta kane ka kam ka la don hapoh ka iingkashari. Ngan ym lah ban ong ei ei sha phi, hynrei baroh ki don ia ka hok ban im.”

“Ai ba ka iingkashari kan shim ia ka rai bad hadien kata ngin sa iakren,” u la bynrap.

Haba kylli hato ka rukom treikam kaba u la shim kum u MLA ka Pynthorumkhrah ban pynbeit ia ka jingeh jong ki nongdie madan ha Golflink yn lah ban leh kumjuh da ka sorkar ha ka thain Khyndailad, u Bah Hek u la ong ba ha ryngkat ka Dorbar Shnong ki la seisoh ha ka ban pynkynriah ia ki nongdie madan ha Golflink sha ka mall ka bym donkam jingsiew, kata da kaba pynioh ia ki da ka jaka kaba biang ba kin lah ban pyniaid ia ki kam khaii pateng bad kamai kajih.

Kane ka sienjam ka la pynlong ruh ia u Bah AL Hek ba un kylla long u MLA uba nyngkong eh ha ka Jylla u ban tei ia ka iew na ka bynta ki nongshong die madan hapoh ka constituency jong u.

“Baroh ki snem kiba la leit noh, kata naduh ba nga dang pule ha ka kyrdan primary school, nga la iohi ia kine ki nongshong die madan harud surok kiba pyniaid ia ki kam kamai japoh jong ki ha ka thain Golflink. Ynda ngi la ioh lad, ngi la tei ia ka iew na ka bynta ki nongdie madan. Lada ngam bakla, nga dei napdeng kiba nyngkong eh na baroh ki riew sain pyrthei uba la shna ia ka iew na ka bynta ki nongshong madan ka bym donkam ban siew. Ki la don 28 ngut kiba shong ha kaba sdang. Ngi la pynkynriah ia ki ym ha ki jaka kiba kumne kumtai hynrei ha ka jaka kaba heh (mall)” ong u Myntri.

La u sngewkmen ne em ia ka sienjam ba la shim da ka sorkar ban pynbeit ia ka phang kaba iadei bad ki nongshong die madan, u Ba Hek u la ong, “Ngam ong ba ka sienjam ka sorkar ka dei kaba bakla, hynrei ban ai ka lad kamai kajih sha baroh ki nongdie madan ha ki jaka sor kiba hap hapoh Municipal.”

Ha kaba iadei bad ka jingpynslem ban pyndep ia ka projek pynitynnad ha ka thain Polo, u Bah Hek u la ong ba kane ka project ka dang iaid shakhmat. U la kdew ia ka jingpynslem halor ki daw ka jingbunkam jong ki tnad bad ka jingpyntreikam jong ki kontraktor ia ka project.