Ban wanrah iaka jingiatreilang ai jinghikai ka UPHC Loomkyrwiang iaki MAS bankyntiew iaka koit ka khiah

Syllad | The Rising MeghalayaFebruary 8, 2025

Kum shibynta ban pyntyllun iaki kam ai jingshakri ha kaba iadei ban pynthikna ban ioh iaka koit ka khiah kaba pura, ka Urban Primary Health Centre, Loomkyrwiang haka 7 tarik Rymphang kala shimkhia ban pynlong daka jingai jinghikai ne Orientation Programme iaki dkhot jong ki Mahila Arogya Samiti (MAS).

Ka MAS ka dei ka kynhun jong ki longkmie ban pynsngewthuh iaki paid nongshong shnong ha kaban kyntiew iaka koit ka khiah bad ki jingeh ba ki iakynduh.

Ka jingthmu ba hakhmat ka long ban wanrah iaka rukom treikam kaba iajan bad sngewthuh jingmut hapdeng ki briew ka UPHC, Asha bad ki dkhot ka Mahila Arogya Samiti kiba don haki dong ki shnong bapher bapher.

Iaka jingialang la pyniaid da u Dr. W. Suna, Medical Officer i/c UPHC, Loomkyrwiang katba ka Kong Marsalan Toi, ANM UPHC, Loomkyrwiang kala batai shaphang ki dak ki shin jong ka jingpang Leprosy, ka Kong MF Tariang, Staff Nurse UPHC Loomkyrwiang kala batai shaphang ka nongrim treikam jong ki Mahila Arogya Samiti katba ka Kong Syiemki Pakyntein, Office Clerk kala batai shaphang ka Untied Funds.

Shuh shuh kaba kham kyrpang ha kane ka sngi dei da ka jingdonlang ka Dr. Bhawya jong ka WHO Delhi kaba la batai shaphang ki jait jingpang ba donkam bha ban shimkhia ki Community Health Worker.

Kala kyntu ban pynphriang iaka khubor ha man ki dong ki shnong ba ka jingai injek tikna iaki khunlung, ki longkmie ka long kaba donkam bha bad ymdei ban khein sting lada jia don ka jingshitom prie, pynhiar, jingpang jem shyieng, shitmet hynrei dei ban leit sumar kloi khnang ba na ka liang ki briew ka tnat ka koit ka khiah kin lah ban leh ia kaba donkam haka por kaba biang.

Ha kane ka juh ka sngi ka la pynlong Special Outreach Health Camp ka UPHC Loomkyrwiang ha ha Iungwalieh ka Loomkyrwiang Dorbar Shnong.

Ha kane ka Special Outreach Health Camp la wan shim bynta ymtang ki khun ka dorbar shnong kumjuh kiba nabar shnong ruh ki ioh jingmyntoi lyngba ki test ki dawai katkum ki jingshitom.

Ha kane ka Special Outreach Health Camp nalor u Dr. W Suna, Medical Officer i/c UPHC, Loomkyrwiang, la donlang ruh ki briew na Bansara Eye Care Clinic, Jowai kiba la leh kyrpang iaka Free Eye Check-up bad ka ai dawai ei.