Ban shngain ki nongleit nongwan, leit pynieng Radium Tape ka KSU, FKJGP ha surok Laitlyngkot-Mawlieh

Syllad | The Rising MeghalayaAugust 18, 2025

Ki dkhot ka Khasi Students Union (KSU) South East Central Circle bad ka Federation of Khasi, Jaintia, and Garo People (FKJGP) Riwar Circle ki la shim ia ka sienjam ban pynthikna halor ka jingshngain jong ki nongleit nongwan da kaba leit ban pynieng ia ki Radium Retro Reflective Tape (RRRT) ha shilynter ka surok na Laitlyngkot sha Mawlieh ha ka 16 tarik Nailar 2025.

Hadien ba na ka liang ka sorkar jylla bad ka kompeni ba pyntrei ia ka package II jong kane ka project surok Shillong – Dawki kim shym la suitniew ia ka jingkyrpad kaba bunsien, kumta kine ki ar seng ki la shim ia kane ka sienjam ban leit pynieng hi ia kine ki RRRT ha shilynter jong kane ka surok khnang ban pynkhlain ia ka jingshai ban lah ban iohi khnang ban khanglad na ki jingjia aksiden khamtam ha ka por mynmiet lane ha dum bneng.

Kane ka sienjam ba la shim da ka KSU bad ka FKJGP ka la wan long ruh hadien ba na ka liang ka kompeni ka la pulom ban bud ryntih ia ki kyndon kiba iadei bad ka jingshngain ha ka leit ka wan ha ka por ba pyntrei ia kane ka surok.

“Na ka liang kine ki ar seng la bunsien ki la leit ban iakren bad ki bor ba dei khmih na ka liang ka sorkar bad ka kompeni ba pyntrei ia kane ka surok, hynrei kane kam shym la poi shano shano ruh, kumta ki la shim ia kane ka sienjam na ka bynta ka jingsuk bad jingshngain jong ki nongleit nongwan ha ka thain Pynursla Sub Division,” ong u kyrwoh lyngba u president ka KSU-SECC u Basuklang Nongwar bad president ka FKJGP Ri War u Evanfield Khonglam

Kine ki ar seng ki la maham ruh ban leh da kaba tyngeh lada ka sorkar bad ka kompeni ba pyntrei ia kane ka surok ki pulom ban shim ia ka jingkitkhlieh ban khmih na ka bynta ka jingshngain jong ki nongleit nongwan.