Ban shngain ka leit ka wan, dawa ka WJSU ban pynbeit iaka niah kali thurmur ha NH 206

Syllad | The Rising MeghalayaFebruary 3, 2024

Ka seng War Jaintia Students’ Union (WJSU) ka la dawa bad kyntu ïa ka seng jong ki trai bad nongñiah trok- ka War Jaintia Trucks Owners and Drivers Association ban shimkhia halor ka jingshngaiñ hapdeng ka jingïaid lynti jong ki trok ha surok ka Amlari-Nongtalang-Tamabil ne ki bynta jong ka surok bah NH 206 (NH40E).

Ha ka kyrwoh lyngba u Vice President ka WJSU u samla Kat L Talang ba la phah sha u President ka War Jaintia Trucks Owners and Drivers Association ka seng ka lah pynpaw, ba ka la buh kane ka jingdawa hadien ka jingujor ba ka lah ïoh na kiba bun khamtam ki nongleit nongwan lyngba kine ki surok. Kawei napdeng ki jingujor ka dei ka jingñiah kali khlem akor jong ki nongñiah trok kaba buh jingma ïa kiwei pat, bad kine ki jingleh bym suidñiew bad bym kheiñ ïa ka mynsiem briew ka pyni ba donkam  ban shim ki sienjam pyntreikam kiba mardor.

Ka seng ka la kdew ruh ba kiwei de ki jingujor ki kynthup ‘Ka jingshim pas kulmar ki draibar kaba wallam pat ka jingdheng kali, ka jingleh thurmur hadien ka jingpynhap tiar, ka jingpynïeng kali kulmar, bad ka jingïeng kali arlaiñ kaba lah pynthut halor ka leit ka wan jong ki paidbah khamtam ha ka por mynstep.

Ha ka jingpynpaw ba ka seng ba dei khmih halor kine ki trok ka dei ban don ka jingkitkhlieh na ka bynta ka jingshngaiñ ki paidbah, ka WJSU ka la banbor halor ka jingdonkam kyrkieh ban tuklar ban tehlakam khamtam kito ki draibar kiba kham ïaidlait bad kiba ym da pyrkhat na ka bynta kiwei bad kumjuh ruh kito kiba dih buaid hapdeng ba ki ñiah kali.

Kane ka jingdawa bad kyntu ka pyni halor ka jingdonkam na ka bynta ban shim ki sienjam pyntreikam kiba wanrah ka jingshngaiñ ïa ki nongleit nongwan ha ka surok bah, kumjuh ruh ban ïada bad khanglad ka jingma jong ka jingim briew ki jingdon jingem na ki kam ki jingleh jong ki nongñiah trok.