Ban kyntiew iaka ka jingnang jingstad pynrung skul ka ophis u BMC, SSA Amlarem iaki khynnah haka shnong Pdengshakap

Syllad | The Rising MeghalayaSeptember 29, 2023

Kum shibynta ka jingrakhe ia ka sngi jong ka thoh ka pule puthi bad ruh ban pynphriang ia ka khubor jong ka jingnang jingstad halor ka mat kyrpang ‘Promoting Literacy for a world in transition: Building the foundation for sustainable and peaceful societies.

Ha ka 28 tarik Nailur ha shnong Pdengshakap ka ophis treikam u Block Mission Cordinator, SSA Amalarem ka la pynlong ia ka Enrolment Drive Programme ryngkat ka jingiaid rally ki khynnah skul ban pyrta ia ka khubor jong ka jingkordor ka jingnang jingstad ha kane ka juk mynta.

Ha ka jingialang ba la pyniaid da u HC Lamin, BMC, SSA Amlarem laioh ka jingkren pdiang burom na u A Kassar, Headteacher Pdengshakap Govt. LPS katba ia ki kyntien maitphang halor ka nongrim jong World Literacy Day la kren da u S.D.Laloo, DCCM, SSA bad haba kut ka jingialang ka P.Suting, CRP Pdengshakap Cluster ka lai ki kyntien khublei.

U W.Chyrmang ba long u kongsan jong kane ka jingrakhe haba ai jingkren u la khot bad wer ia ki khynnah ba kin long kiba minot bad treishitom ha ka jingpule jongki namar ka jingnang jingstad  ka long u shabi jong ka jingim bad haba don ka jingnang jingstad ka pynlait ia u briew na kiba bun ki jingshahteh mraw kiba wan ha ki dur ki rukom bapher.

Na ka liang u BMC, SSA Amlarem ryngkat ka DMC-SSA SEMAM, West Jaintia Hills halor ki kam babha jong ki Volunteer haman ki Special Training Centre ki la shim ban pynkyrpang ia kane ka jingrakhe da kaba pynkup burom ia ki 11 ngut ki Volunteer kiba la trei borbah ban saindur saindar ia kito ki khynnah ba don hapdeng ka jingduh jingkyrmen ha ka ban ioh ia ka jingnang thoh nang pule.

Shuh shuh ladon ruh ka jingsam ia ki trophy sha ki khynnah ba jop ha ka Drawing-Painting Competition halor ki jingdro ba iadei bad ka pule puthi bad ruh ka jingsam ia ki Mememto sha ka Pdengkseh Govt. LPS, Pamtbuh Govt. LPS bad Pdengshakap Govt. LPS kiba long ki nongjop jong ka Slogan Competition.