Ban kyntiew ia ki lad pyniasoh ha ki thain khappud, plie ka Kong Santa ia ka jingkieng ha wah Amsngad, Ratacherra

Syllad | The Rising MeghalayaJune 19, 2025

Khnang ban kyntiew shuh shuh ia ki lad pyniasoh na ka bynta ki nongshong shnong ha ki thain khappud, ka MLA ka Sutnga -Saipung ka Kong Santa Mary Shylla ha ka 17 tarik Jylliew ka la plie paidbah ia ka jingkieng iaid kjat halor jong ka wah Amsngad hapoh ka shnong Ratacherra, East Jaintia Hills District.

Lyngba ka jingbei tyngka da ka sorkar jylla hapoh jong ka Inter-State Border Areas Development Programme (ISBADP) 2023-24, ia kane ka jingkieng iaid kjat kan iarap shibun ia ki nongshong shnong kiba shong ba sah ha ki thain khappud ha kaba iadei bad ka jingpyniasoh khamtam na ka bynta ki nongshong shnong jong ka shnong Saitual.

Haba kren ha ka jingialang plie ia kane ka jingkieng, ka Kong Santa Mary ka la pyrto ia ka jingtrei shitom jong ki nongshong shnong bad ka ophis Border Areas Development Officer (BADO), Khliehriat halor ka jingiatreilang ban pynthikna ba kane ka project kan long kaba seisoh, da kaba ban jur ruh ba kane ka jingkieng iaid kjat kan ai ka jingshakri ha ka jingpyniasoh khamtam ia kito kiba shong ba sah ha ki thain khappud.

Ka la bynrap ruh ba kane ka jingkieng kan pyniasoh bad kham pynjan shuh shuh ia ki briew na ka shnong Saitual sha ki shnong kiba marjan kiba kynthup ia ka Ratacherra, Umkiang bad kiwei kiwei.

Na ka liang u Rangbah Shnong ka Ratacherra u Bah Pynkhlain Dhar ha ka jingkren u la iaroh halor ka jinglah ban pyntreikam ia kane ka project da kaba pynpaw ruh ba hashwa ki nongshong shnong na Saitual ki la mad ia ka jingeh kaba khraw ban jam lyngba ia kane ka jaka bad ki nongshong shnong ka Ratacherra ruh ki la iakynduh jingeh ban poi sha shiliang jong ka wah na ka bynta ki kam rep kam riang, hynrei mynta kine ki jingeh ki la kut noh da ka jingplie ia kane ka jingkieng iaid kjat.