Ban kyntiew ia ka digital education, aiti u MLA Jowai da ki kor computer sha 14 tylli ki skul

Syllad | The Rising MeghalayaJune 21, 2025

Ha ka sienjam kaba kongsan ban kyntiew ia ka digital education, ka ophis u Deputy Commissioner, West Jaiñtia Hills District, Jowai lyngba u MLA ka thain bad Chairman ka MUDA u Bah Wailadmiki Shylla ka la ioh ban sam haduh 200 tylli ki kor computer sha ki 14 tylli ki skul hapoh ka District ha ka kylla kaba nyngkong.

Kane ka prokram ba la pynlong da ka ophis u DC Jowai hapoh ka Pradhan Mantri Khanij  Kshetra Kalyan Yojna ((PMKKKY) Scheme ba la bei tyngka da ka District Mineral Foundation (DMF) ka buh ia kane ka thong na ka bynta baroh ki kyrdan jingpule, kata na ka bynta ki Secondary bad Higher Secondary School.

Haba kren ha kane ka jingialang u MLA u la ban jur halor ka jingkongsan jong ka jingnang jingtip ia ki kor digital ha kane ka juk kaba mynta. U pynpaw ka jingsngew skhem ba kane ka sienjam ba la shim da ka ophis u DC kan kyntiew shibun ha ka liang ka pule puthi bad ban pynkhreh ia ki khynnah pule ban roi ha ka lawei jong ka teknologi.

U MLA u la ai khublei ruh ia u heh ka District halor ka jingialam khmat bad ka jingpyrshang ban kyntiew ia ka standard jong ka pule pule hapoh ka District. U la pynshlur ruh ia ki nonghikai ba kin iasam ia kino kino ki jingeh kiba ki iakynduh, khamtam ha kaba iadei bad ki jingtei da kaba kular ban ai ia ka jingkyrshan kaba pura.

Na ka liang u DC u Abhinav Kumar Singh ha ka jingkren u la ong ba kum shibynta jong ka jingthmu kaba kham heh yn sa pyntreikam ia ka jingai jinghikai pyntbit ba la pynbiang da ka Microsoft ha ka kylla kaba ar ha kaba yn ai jinghikai ia uwei u nonghikai na kawei pa kawei ka skul.

U la ban jur ruh ba kane ka sienjam ka thmu ban pyniar ia ka jinglah ban ioh ia ki kor computer bad ban pynbun ia ka jingpynrung ha ka Computer Science kaba mynta ka duna bha hapoh ka District.

Napdeng ki skul kiba la ioh ia kine ki kor computer ki kynthup ia ka Sohkha Government Higher Secondary School, Sohkha 17 tylli, Government Boys’ Higher Secondary School, Jowai 23 tylli, Kiang Nangbah Government Higher Secondary School, Jowai 26 tylli bad Government Girls Higher Secondary School, Jowai 20 tylli.

Katba ka Jowai Public School, Jowai bad ka Government UPS Mowkaiaw & RMSA  ki la ioh pdiang mar 13 ki computer.

Ka Shangpung RMSA Secondary School, Jowai RMSA Secondary School, Government Senior Basic & RMSA Higher Secondary School Mynso bad ka Nongtalang Government Secondary School ki la ioh pdiang mar 12 tylli.

Katba ka Shkenpyrsit UP SSA & RMSA Secondary School, Mustem SSA UP & RMSA Secondary School, Barato Government UP & RMSA Secondary school bad ka Trangblang Government UP & RMSA Secondary School ki la ioh mar 10 tylli.

 Ia kane ka prokram la pyniaid da u Bah G L C Mylliem, Assistant Commissioner.