Ban jur u Bah Kyrmen Shylla ba donkam ia ka jingiatreilang ban rat dyngkhong ia u droks

Syllad | The Rising MeghalayaJuly 17, 2025

U Myntri Sorkar u Bah Kyrmen Shylla u la ban jur halor ka jingdonkam ia ka jingiatreilang jong baroh ki kynhun bapher bapher ha ka jingiakhun pyrshah ia u drok khnang ban lah ban rat dyngkhong na kane ka jylla.

Haba kren sha ki nongthoh khubor haka sngi Balang, u Bah Kyrmen u la ban jur halor ka jingdonkam jong ki riew shimet, ki longiing longsem bad ki nongshong shnong ba kin iatreilang ban ai ka jingkyrshan na ka bynta kito kiba la shah ktah namar ka jingkyrni ha u drok, bad ula ai ruh ka jingiaroh ia ki sienjam ba la shim da ki Dorbar Shnong ha ki shnong bapher bapher kiba la trei borbah ban khanglad ia ka jingpyndonkam drok hapdeng ki samla.

U Myntri u la ban jur ruh halor ka bynta jong ki MLA ban wanrah ia ki kam ialehkai sports bad kiwei pat ki sienjam ban pyndon bynta ia ki samla khnang ba kin lah ban kiar na u drok. U la iaroh ruh ia ki sienjam ba la shim da ki Tnad sorkar kynthup ia ka Tnad pulit bad ka Tnad ka koit ka khiah ha ka jingiakhun pyrshah ia u drok.

Da kaba pynksan halor ka jingdonkam ia ka jingiamir jingmut bad jingkyrshan ia kito ki briew bad ki longiing longsem kiba la shah ktah ha u drok, u Myntri u kyntu ia kito ki briew ba kim dei ban buhrieh ne sngew lehrain ia la ki jong kiba haiing hasem kiba la kyrni ha u drok, hynrei ban tyrwa ia ka jingkyrshan bad iarap ha ka jingialeh ka jong ki.

Haba kylli, u Bah Kyrmen u la ong ba watla ki jaka talasi ki long kiba donkam ban khangwan ia ka jingwan rung jong u drok, hynrei kam dei satia tang kane ka lad ban weng ia ki jingeh. U la ai nuksa kum ia ka ri USA kaba watla ka la don ia ki kot ki bor buddien kiba khlain, hynrei ka dang bteng ban mad jingeh ha kaba iadei bad u drok.

Nalor kata u la ban jur ruh halor ka jingdonkam ban pyndait ia ki CCTV Camera na ka bynta ka jingshngain jong ki nongwan shangkai kumjuh ki nongshong shnong hapoh Meghalaya kumjuh ban pyniar ia ka Shillong Integrated Command and Control System sha kiwei pat ki district ka Jylla khamtam ha Rilum Jaintia.