Bam duh ka ding iaki basa die ktung ha Iawthymme Jowai, julor da ki lakh tyngka

Syllad | The Rising MeghalayaDecember 5, 2021

Ka ding kaba la klang jur kynsan kynsan haka por kumba 6:30- 6:45 Pm kala bam duh iaki basa die ktung kaba don ha iew Iawthymme, Ladthadlaboh, Jowai haka Sngi U Blei.

Ha kane ka jingjia ym don mano mano ba mynsaw, hynrei kine ki basa die ktung kiba don haduh 30 tylli eiei kila kylla dpei. La iathuh ba ka ding kala pur na kawei ka dukan die sha bad pur sha ki basa die ktung.

La iathuh ba ki don ruh ki nongkhaii kiba dang shu pynpoi iaki ktung mynta ka janmiet, hynrei kine ruh kila shah bam duh ha ki ding.

Ki pulit pynlip ding kila wan mar mar ban tem ia ka ding, hynrei namar ba kine ki basa iew kidei kiba la shu shna da ki dieng, ki thyliej ding kila ioh ban pur sted bad bamduh iaki basa iew haduh ban da julor phom.

Haduh 5-6 tylli ki kali pynlip ding kila wan poi ban pynlip iaka ding haduh ka por 8 Pm.

Halor kane ka jingjia ka jingtohkit kala iaid shakhmat.