Ba siat pynma ki security guard ka Star Cement, mih jingklumar, ong ka KSU

Syllad | The Rising MeghalayaMay 19, 2025

Ka Khasi Students’ Union (KSU) Lumshnong Unit ka la pynpaw ka jingsngewkhia kaba jur halor ka jingsiat pynma ki security guard ka Star Cement ha ka 18 tarik Jymmang, kaba la wanrah ka jingklumar kaba jur ha Lumshnong, East Jaiñtia Hills.

Kane ka jingjia kala jia hadien ba u samla Sngewlang Suchiang, 19 snem ka rta na Lumshnong, ula shah iuh haka trok 16 shaka jong ka Star Cement bad kaba niah da u Sailangmi Dkhar na Mookynniang, Khliehtyrshi, West Jaintia Hills District.

Ha u kyrwoh ba la phah da u samla Mechak Kyndoh, General Secretary ka KSU Lumshnong Unit, u la ong ba u samla Sngewlang uba niah iaka kali pickup u mut ban shim pass ia kane ka kali company bun sien naduh shnong Wahiajer, Narpuh, hynrei une u driver company u khlem ai lad. Haba u Sngewlang uba niah iaka pick-up u la ioh lad ban shim pass, u la leit rung shapoh company Star Cement da ka jingthmu ban ap ia kane ka trok ha gate No. 1 ban kren bad u driver company.

Haba ula kiew ha ka kali ha side handiman ban pyrshang ban iakren, u driver ka kali 16 shaka u la pynher iaka kali ha kaba une ula hap nalor ka trok bad ula khlad noh ha shen. Kane ka paw shai ha ka CCTV kaba la sakhi da ki paidbah, ong ka KSU ha u kyrwoh.

Une u nongialam ka KSU ula ong ba dei hadien kane jingshah iuh kali, ki paidbah jong ka shnong Lumshnong haba ioh jingtip kila mareh sha company bad wad jingshisha bad thwet ia une u driver trok, ki security guard ne nongpahara ka company ki la siat kuli, hynrei donbok ym don ba mynsaw.

Kane ka jingleh kine ki security company da kaba siat kuli pynma kala pynkhie bitar ia u paidbah kaba la wanrah iaka jingklumar thlim, la ong une u nongialam KSU bad bynrap “Jin lada ki security katei ka company ki khlem siat kuli, tharai katei ka jingklumar kam don hi.”

Ka jingjia ba triem ha Star Cement kala jia hadien ka jingiabeh thong na ka jingtynrah kali

Ka KSU ka buh ka jingmaham ia kitei ki truck jong ka company Star Cement namar ka jingleh baheh haba ñiah kali, ki pynher sted khlem khein shuh iano iano. Ka company ka dei ban pynduh kam ia kum kitei ki nongñiah bymkhein snep ia ki para briew.

Ka KSU kala pynkynmaw ba dang ha kine ki khyndiat bnai ha ka por ba kitei ki nongñiah kali company Star Cement ki dawa ia ka hok na katei ka company ban pynkiew bai kali ia ki, ki samla jong ka shnong Lumshnong ruh da ka mynsiem sngewlem paradoh parasnam ki leit ban synranlang ha ryngkat ki dkhot ka VPP ban dawa ia ka hok. Pynban pleng da kumne ki siew kylliang ia ki mynsiem ba lui lui ki nongshong shnong.

Ka seng ka pynrem jur ruh ïa ka jingleh riew khlaw une u driver company uba la shim ïa ka jingim jong u samla bad ka dawa ba dei ban kem bad pynshitom katkum ka aiñ.

Ka KSU ka dawa ruh na ka company Star Cement ba kan kit khlieh hi ia kane namar ka kali dei hi jong ka. Ka longïng jong une u samla ba khlad ka dei kaba duk, dei tang une marwei uba iarap ia la u kpa ba pli ban bsa ia ka iing. Ka jingkhlad jong u kadei ka jingduhnong kaba khraw iaka iing ka sem.

Ka KSU ka phah ruh iaka khubor sngewlem sha kiba ha iing ha sem bad baroh kiba don jingiadei bad u samla Sngewlang.