Ba shimkhia mardor ka Sorkar la ithuh shuh shuh ia ki Centre thoh eksam CUET-UG ha ka Jylla

Syllad | The Rising MeghalayaMay 14, 2025

U Commissioner & Secretary ka Tnad Education ka Jylla u Vijay Kumar Mantri haka 13 tarik Jymmang u pyntip ba ka Sorkar jylla ka la shimkhia bad tuklar mardor ha kaba iadei bad ka eksam Common University Entrance Test (CUET-UG) 2025, ha kaba da ka jingiatreilang bad ka National Testing Agency (NTA) la lah ban ithuh shuh shuh ia ki Centre thoh eksam hapoh Meghalaya.

Baroh ki samla kiba la shah ktah namar ka jingshah pynngat thoh eksam sha ki centre kiba don shabar ka jylla mynta kin sa ioh ban ialeh ha ki centre kiba don hapoh ka jylla, ong u Mantri.

Haba pynpaw ba ka sorkar jylla kam don bynta ei ei halor ka jingpynngat centre ia ki samla pule, u Commissioner & Secretary u la ong ba ka long kaba donkam ban tip ba ka jingpynngat ia ki centre thoh eksam ka dei kaba la leh pura tang da ka NTA da kaba pyndonkam ia ka Automated Software System.

Kane ka System ka pyngnat ia ki centre katkum ka jingjied hi da ki samla ba iakhun ia ka eksam. Ki samla ki donkam ban jied ia ki sawtylli ki jaka thoh eksam bad kane ka system ka jied ia ki centre napdeng kine ki sawtylli ba la jied hi da ki samla. Kumta lada ki samla ki ngat shabar na ka jylla Meghalaya, ka dei namar ba ki la jied ia ki jaka kum kawei na ki jaka kaba ki kwah. Kane ka kynthup ia ki jingjia ha kaba ki samla ki la shah pynngat ban leit thoh ia ka eksdam wat shaduh sha Port Blair.

Baroh ki don haduh 12,685 ngut ki samla pule na Meghalaya kiba la register ban ialeh ia ka eksam CUET (UG) 2025. Na kine 7742 ngut ki samla ki la shah pynngat ha ki centre kiba don ha Meghalaya namar ka jingduna ki centre. Katba haduh 4,943 ngut kiwei pat ki la shah pynngat ha ki centre kiba don shabar ka jylla. Na kine 4,654 ngut ki la shah pynngat ha ki centre kiba don ha Assam bad tang 289 ngut ki la shah pynngat ha ki centre kiba don shabar ka Meghalaya bad Assam.

Napdeng kine tang 93 ngut ki samla ki la shah pynngat sha ki centre kiba don shabar jong ka thain Shatei Lammihngi bad uwei u samla u la shah pynngat sha Port Blair, kata kaba dei ka jingjied hi ka jong ki ia ka jaka kaba ar.

U Mantri u pyntip ruh ba ki don tang artylli ki sor ban jied ha Meghalaya bad 5 tylli ki sor ban jied ha Assam. Namar ba ka system ka buh ban jied beit thik tang na ki sawtylli ki jaka ba la jied hi da ki samla pule, ki samla ki la dei ban jied beit thik tang kawei napdeng kine ki hynniew tylli ki jaka sor ban lait na k jinghap leit shabar jong ka thain.

Halor ka jingslem ban pyntip ia ka jingduna ki centre, u Mantri u la ong ha kaba iadei bad ka eksam CUET (UG) 2025, ka NTA kam shym la aijingtip lypa sha ka sorkar jylla halor k jingduna jong ki centre thoh eksam hapoh ka jylla. Hynrei kane ka kam ka la wan jia tad ha ka khyllipmat ba khatduh hadien ba bun na ki samla pule ki la shah pynngat sha ki centre shabar jong ka jylla Meghalaya.

Watla katta u la pyntip ba ka sorkar mar ia ioh jingtip ia kane ka bynta ka la buh haduh 800 tylli ki kor computer ha kylleng ki jaka pule ban pynlong kum ki centre thoh eksam ha kaba la aijingtip ruh ia kane sha ka NTA.

Ka NTA ka la thung ia ka Tata Consultancy Services (TCS) kum ka agency ka ban khmih bad pynshisha ia ki centre ki ban pyndonkam da i kor computer. Kane ka dei ka bynta kaba hap ban leh ka ban shimpor kumba katto katne sngi, bad ka jingjurip ia kine ki centre mynta ka la iaid shakhmat.

Ha kajuh ka por u Commissioner & Secretary u la ong ba ka Tnad Education ka pynpaw ka jingsngewnguh ia ka jingkyrshan jong ki skul bad ki college bapher bapher ha kylleng ka jylla Meghalaya kiba la wan shakhmat ban tyrwa ia ki computer lab na ka bynta ban pynlong ia ka eksam CUET.

Watla katta u la ong ba katto katne ki jaka pule kim pat shym la tyrwa ia ka jingkyrshan ka jong ki kaba lam sha ka jingduna ban pynioh ia ki eksam centre ban pyndonkam da ki kor computer.U la ong ba dei ban sngewthuh ba ka jingai ia ka jingkyrshan ia ka NTA ban ioh shuh shuh ia ki centre thoh eksam kan long ka jingiarap ia ki samla pule ka jylla Meghalaya bad kumta ka jingkyrshan jong baroh ki jaka pule puthi ka long kaba kongsan ban pynbeit ia kane ka jingeh.

Nalor kata u la ong ba ka NTA ka la pynpaw ka jingsngew skhem ba baroh kito ki samla pule kiba dei ban iakhun ia ka eksam hadien ka 16 tarik Jymmang, bad kiba la jied ban thoh ia ka eksam ha Meghalaya hynrei kiba la shah pynngat shabar ka jylla kin sa ioh lad noh ban thoh ha ki centre hapoh ka jylla Meghalaya, ia kaba ka Tnad Education kan sa pynthikna lashai ne la shi sngi.