Ba paw pyrthei ki jingshisha kito kiba pynthohbria ia ka jylla ki dei ban pan map mardor: Myntri

Syllad | The Rising MeghalayaJune 10, 2025

U Myntri ka Tnad pule puthi ka Jylla u Rakkam A Sangma haka sngi ba Ar u la ong namar ba ka hok bad ka jingshisha ka paw pyrthei halor ka jingjia shah pyniap jong uwei u nongwan shangkai na Indore, kumta ruh kito kiba don bynta ha kaba pynthohbria bad pynbudnam sniew ia ka jylla Meghalaya ki dei ban pan map mardor.

“Nga sngew ba kito kiba kynnoh bad pynthohbria ia ka Meghalaya bad ki briew jong ngi ki dei ban pan map mardor, ” ong u Myntri haba kren sha ki lad pathai khubor.

U la ong ruh ba u sngewktah jur ban iohi ia ki briew ha ki rynsan social media bad ki lad pathai khubor kiba na shabar ka jylla ne national media kiba kynnoh ia ka jylla bad ki nongshong shnong jong ka khlem da tip ia ki jingshisha halor jong ka jingjia baroh.

“Ngim dei kita ki jait briew bad ka jingshisha ha kaba khatduh ka la paw pyrthei mynta,” ong u Rakkam da kaba pyrto ruh halor ki sienjam kiba sted ban ioh kem ia ki runar kiba donkti kynthup ia ka Sonam kaba dei ka kurim jong utei u lanot u Raja Raghuvanshi uba la shah pyniap dusmon ha ka jingwan shangkai sngewbha sha Sohra.

U Rakkam u la ong ba ki briew namar ka jingjur palat ka jingsngewsih ki la shah pynbor ban kynthoh lamwir hynrei kaei kaba kongsan ka long ka jingshisha halor kaei kaba la jia bad kaba la paw pyrthei ha kaba khatduh.