Ba jur ki kam thombor ia ki khynnah, kyntu ka MPMC ia u CM ban phah khang ia ki website phlim khlemakor

Syllad | The Rising MeghalayaApril 17, 2025

Ka Meghalaya Pradesh Mahila Congress (MPMC) ha ka 17 tarik Iaiong ka la kyntu ia u Myntri Rangbah ka Jylla u Conrad K Sangma ba un tuklar na ka bynta ban phah khang noh ia ki website jong ki phlim khlemakor khnang ban lah ban tehlakam ia ki kam thombor bad lehbor pyrshah ia ki khynnah hapoh ka jylla.

Ha ka shithi sha u Conrad Sangma, ka president ka MPMC ka Kong Joplyn Scott Shylla ka la pynpaw ka jingsngewkhia kaba jur halor ka jingnangkiew ki kam thombor pyrshah ia ki kynthei khamtam ia ki khynnah ha kylleng ka jylla.

“Ka dei ka phang kaba sngewkhia shibun bad kaba la pynkhih ia ka jingsngew jong ka imlang sahlang jong ngi, bad ngi ngeit ba ka jingtuklar ba mardor ka long kaba donkam ha ka kyrdan ki nongthaw policy na ka bynta ban weng ia kawei na ki daw tynrai kaba lam sha kine ki kam bymman,” ka la ong.

Nalor kata ka Kong Shylla ka la kam ruh ba ki don ki sakhi satar bad ki paidbah ki sngewkhia jur halor ka jingioh lad da kaba suk ban ioh peit ia kiba kum kine ki phlim khlemakor lyngba ki kor internet bad kaba la ktah bha ia ki jingmut jingpyrkhat jong ki samla bad kaba lam sha ki kam kiba bakla, ba sngewsih bad kaba lam sha ki kam bymman ba shyrkhei kum ki kam leh beijot ia ka longrynieng jong ki khynnah.

“Kum ka seng kaba kut jingmut ban khmih na ka bynta ka bha ka miat bad ka jingiada ia ki kynthei bad khynnah, ngi kyrpad jur ia ka ophis jong phi ban shim mardor ia ki sienjam ban khang noh ia ki website phlim akor hapoh ka jylla Meghalaya, ban pynkhlain ia ki jingpeitngor bad pyntreikam ia ki kyndon kiba pyrkhing lyngba ki kor internet, ban iatreilang bad ki ISPs bad ki tnad jong ka ain ban pynthikna ia kane ka jingkhang ia ki website khlemakor, ban ai ki jingpynsngewthuh hapoh ki skul bad ki shnong ki thaw halor ka jingshngain jong ki kor digital, ka jingburom bad ki jingma kiba mih na kum kine ki jingleh jingkam,” ka la dawa.