Ba jur ka jingshlei um ha Guwahati mynjur ka Meghalaya-Assam ban phah wad bniah ha ka NESAC

Syllad | The Rising MeghalayaJune 3, 2025

Ka Sorkar Meghalaya bad Assam ki la mynjur ban bynshet ha ka North Eastern Space Application Centre (NESAC) ba kan pynlong ia ka jingwad bniah lyngba ki kor satellite ha kaba iadei bad ki jingshlei um ba shyrkhei kiba jia khah khah ha ki bynta jong ka sor Guwahati bad ban aiti ia ka kaiphod hapoh ka lai bnai.

Ia kane ka rai la shim ha ka jingialang hapdeng ki Myntri Rangbah jong kine ki ar jylla, kata u Conrad K Sangma bad u Himanta BiswaSarma kaba la long ha ka 2 tarik Jylliew ha Guwahati.

“Ngi la shim ia ka rai ban pan jingiarap na ka NESAC ba kan pynlong ia ka jingwad bniah lyngba ki kor satellite ia ki jaka khlaw bapher bapher ha ki bynta khappud ka Meghalaya bad Assam khnang ban lap ia ki daw tynrai kiba lam sha kane ka jingshlei um hapoh sor Guwahati. Hadien ba la pyndep ia kane ka jingwad bniah ha kine ki khyndiat bnai ki ban wan ngin sa iakren ia ki agency kum ka IIT Roorkee ba kan bishar bniah bad ban wanrah ia ki sienjam ban weng ia kane ka jingeh ia kiba lah ban pyntreikam da baroh ki ar jylla bad ki ban long ki jingmyntoi ia baroh ki ar jylla,” ong u Conrad hadien ka jingialang.

Haba kubur ia ka jingsngewkhia halor ka jingshlei um ha Guwahati, u Conrad u la pynpaw ka jingsngewkhia bad ba kumno kine ki ar jylla kin lah ban iatreilang ban wad ia ki lad ki lynti ban pynduna ia kane ka jingshlei um ha sor Guwahati bad ruh ban wad ia ki la ki lynti ban weng ia ki jingeh jong ki nongshong shnong kiba don sha ka liang ka Meghalaya, khamtam kito kiba kamai jakpoh da kaba die jingdie.

Ha kane ka jingialang kine ki ar jylla ki la mynjur ruh ban plie lang noh ia ka Kulsi multi-purpose irrigation and hydroelectric power project kaba la sahteng mynta la slem bah.

“Ka Assam bad ka Meghalaya ha ki por kiba la leit noh ki la pynpaw ba ngi long kiba plie ban iakren ia ki mat bapher bapher. Ki jingeh kin don beit, hynrei kaei kaba kongsan ka long ba ngi dei ban iakren bad pyrshang ban wad ia ki lad ki lynti ban weng ia ki jingeh. Ka Kulsi project ka dei ka jingjop kaba khraw ia baroh ki artylli, la ka long ha ka liang ka jingpynmih bording, ka jingsam um sha ki jaka rep lane ka jingkyntiew ia ki kam jngohkai bad baroh ki ar sorkar ki la rai ban iatreilang bad rai ban pyniaid shakhmat ia kane ka project,” ong u Conrad Sangma.