Ba jur ka jingshah banbor lah ban weng noh ka Congress na ka EC ba ialam da ka NPP ha KHADC

Syllad | The Rising MeghalayaDecember 8, 2024

Ki arngut ki MDC ka Congress ki lah ban weng noh ia lade na ka Executive Committee (EC) kaba la ialam da ka seng National People’s Party (NPP) ha Khasi Hills Autonomous District Council (KHADC) hashwa ka elekshon ka ban wan namar ka jingbteng ka jingpynbor da ki nongtrei ka party bad kumjuh na ka AICC.

Ki tyllong khubor ha ka 8 tarik Nohprah ki pyntip ba shen yn sa shim ia ka rai halor kane ka kam khamtam haba buh jingmut ba u Working President ka Congress uba dei ruh u Deputy Chief Executive Member u Bah Pynshngainlang N Syiem un sa pan ban iakhun biang ia kane ka elekshon ka ban wan na kane ka party.

“Kumta ruh ka jingbteng ka jingbanbor ka lah ban pynlong ia u Bah PN Syiem ba un ym don da kiwei pat ki lad ki lynti hynrei ban mih noh na ka EC ba la ialam da ka NPP ha KHADC,” ong ka tyllong khubor.

Lah ban kdew ba ka jingdawa ban weng noh ia ka jingkyrshan na ka EC ba la ialam da ka NPP ka dei kaba la shim da ki nongtrei ka party ha ka jingialang kaba la long ha ka 20 tarik u Nailur ba ladep.

Dang shen ki president jong ki District Congress Committee (DCC) ki la thoh ruh sha ka AICC ban phah tuklar lem halor ka jingpynslem jong ki arngut ki MDC ban weng noh ia lade na ka EC ba la ialam da ka NPP ha KHADC.

“Namar kata ngi kyrpad ia ka AICC ba kan pynmih ia ka jingbthah sha u Deputy CEM Bah PN Syiem bad u Bah RV Lyngdoh uba dei ruh u MLA ba ki dei ban weng noh mardor na ka EC ba la ialam da ka NPP. Lada kim kohnguh ia kane ka jingbthah yn shim ia ki sienjam ka jingpynshitom pyrshah ia ki. Kane ka long kaba kongsan bha ban pyni ia ka jingiatylli jong ka seng bad ka jingmu jingmut ban iakhun ia ka elekshon na ka nongrim kaba khlain bad kaba laitluid. Ngi dang iai bteng ban trei na ka bynta ka jingjop jong ka INC ha ka elekshon ka ban wan bad ngi ngeit ba kane ka sienjam ka long kaba kongsan bha ban pynthikna ban ioh ia ka jingshaniah bad ka jingsngew skhem hapdeng ki nongkyrshan ki jong ngi,” ki la pynpaw ha ka shithi sha ka AICC ha ka 26 tarik Naiwieng ba la dep.

Hadien kane, u Secretary ka AICC u Dr Chella Kumar bad u Joint Secretary u Anthony Matthew ki la iakynduh ia ki nongialam bad ki nongtrei ka party ha ka jingialang kaba la long ha ka 2 tarik Nohprah ban iakren halor kane ka kam.

“Ha kane ka jingialang, ki nongialam ka AICC bad ki nongtrei ka party ki la kyntu ia kine ki arngut ki MDC ban shim ia ka jingkhot bad weng noh ia lade na ka EC khlem da pynslem shuh. Halor kane, kine ki arngut ki MDC kin ym don lad da kumwei pat hynrei ban burom ia ka rai jong ki nongtrei ka party da kaba weng noh ia ka jingkyrshan ia ka EC ba la ialam da ka NPP ha KHADC,” ong ki tyllong khubor.