Ba duna ki khynnah skul ba jied iaka Science, sdang ka bor district WJH iaka prokram ‘Tynre wa ka Science’

Syllad | The Rising MeghalayaJune 12, 2025

Ha ka jingpyrshang ban pynroi ia ki jingtip ba iadei bad ka science bad ban kyntiew ia ka jingiashim bynta kaba kham bun jong ki samla pule ha ka liang ka science , ki bor pyniaid District ka West Jaintia Hills hapoh ka jingialam u Deputy Commissioner u Abhinav Kumar Singh ka la pyllait ia ka sienjam (initiative) kaba don ia ka jingiohi jngai kaba la ai kyrteng ‘Tynre wa ka Science’ kaba mut, ‘Ki Tynrai bad ka Science’ ia kaba la pynlong ha ryngkat ka jingiatreilang bad ka National Institute of Technology, Meghalaya ha Sohra.

Ia kane ka jingleit pynpaw pyrthei ne exposure visit kaba nyngkong hapoh jong kane ka sienjam la pynlong ha ka 10 tarik Jylliew hapoh ka jingialam jong u Assistant Commissioner u Bah F. Passah.

Baroh ki don haduh 30 ngut ki samla pule bad uwei u nongmihkhmat na ki nonghikai na kawei kawei ka skul kiba synran ia ki. Napdeng ki skul kiba la iashim bynta ki kynthup ia ka Government Girls Higher Secondary School, Jowai Government Boys Higher Secondary School, Jowai bad Kiang Nangbah Government Higher Secondary School, Jowai.

Ki samla pule kin ioh ia ka lad ban iamir jingmut bad ki nonghikai ne professor kumjuh ki nongwad bniah ne researcher hapoh NIT, ban iashim bynta ha ki jingpyni hapoh ki kamra klas ia ki jingpynbeit hapoh laboratory bad iashim bynta ha ki jingai jinghikai.

Haba kren halor kane ka sienjam, u DC u la ong ba kumba la iohi tang khyndiat eh ki samla pule hapoh ka District ki jied ban pule ia ka Science lyngba ka: ‘Tynre wa ka Science’, ngi thmu ban pynroi ia ka jingkwah tip bad jingsngewthuh shaphang ka science hapdeng ki samla pule Higer Secondary da kaba tyrwa ia ki lyngba ka jingiakynduh kaba beit beit sha ki lad ki lynti ba kham shalor ha kaba iadei bad ki jingtip halor ka saian bad halor ki kabu ha ka liang ka STEM kata kaba iadei bad ka Science, Technology, Engineering, Mathematics.

U la bynrap ruh ba yn phah ia ka kynhun kaba thymmai kaba don 30 ngut ki samla pule sha kane ka exposure trip shisien shitaiew.

“Hadien ba la pyndep ia kane ka exposure tour na ka bynta ki kyrdan Higher Secondary, ngin sa pynjlan ia kane ka prokram da kaba kynthup ia ki khynnah klas IX bad X kiba don ha ka kyrdan ban jied ia ki jaid jingpule jong ki,” ong u DC.

Ha ka sienjam kaba thmu ban iarap ia ki nongshna bad thain kti, ki bor District ka don ruh ia ka jingthmu ban pynlong ia kiba kum kine ki sienjam ha ryngkat ka jingiatreilang bad ka National Institue of Fashion Technology (NIFT), Meghalaya ban aijinghikai ha ki kam shna bad thain kti khnang ban kyntiew ia ki sap ki phong jong ki bad ban pynlong ia ki mar jong ki ki ban kham bha, kham itynnad bad kiba iaid iew.