Ba bun kiba pass, pynsangeh shwa ka Sorkar ia ka jingpynrung klas ban ym duh klas ki samla

Syllad | The Rising MeghalayaApril 10, 2025

U Myntri ka Tnad Pule Puthi u Rakkam A Sangma ha ka 10 tarik Iaiong u la pyntip ba na ka liang ka Sorkar ka la rai ban pynsangeh shwa ia ka jingpynrung klas da ki jaka pule khnang ban wanran ia ka rukom treikam kaba la pynbeit ryntih ban pynthikna ba ka jingpynrung klas ka dei ban long ia baroh ki samla kiba pass ia ka eksam Secondary School Leaving Certificate (SSLC).

Katkum ka jingpynpaw ka jong u, u la ong ba ka sorkar ka dang pynkhreh ban kyntiew kyrdan ia ki Secondary School sha ki Higher Secondary ha baroh kawei ka jylla hadien ka jingkiew kynsan ka jingdon jong ki samla kiba pass ha kane ka eksam SSLC kaba kot haduh 87.10%, kaba dei ka rekod thymmai kaba la tam ia ka percentage jong u snem ba ladep kaba long 55.80% bad kumjuh ia ka percentage ka jingpass ha kine ki 10 snem kiba la dep.

Haba kren sha ki lad pathai khubor, u Rakkam u la ong ba ka Sorkar kam iohi ia kano kano ka jingeh ha kaba iadei bad ka jingioh rung klas jong ki samla ha Shillong namar ba ka percentage kiba pass ka long kumba ju long man la u snem, kata 70 haduh 80%, hynrei la khmih lynti ba ka jingeh kan kham jur ha ki thain nongkyndong jong ki district.

“Ngi la iakynduh bad baroh ki khlieh nongpyniaid jong ki jaka pule. Ngan sa iakynduh ia ki Deputy Commissioner jong ki District bapher bapher ha Rilum Garo ha ka taiew ka ban wan,” u la ong. U la pyntip ba ka sorkar ka la shim ia ki sienjam ban kyntiew kyrdan ia ki skul Secondary sha ki Higher Secondary.

Thaw history ka North Liberty haka Jubilee Rupa: Ka skul kaba nyngkong ban ioh kyrdan nyngkong haka result SSLC na West Jaintia Hills

“Ngi pynshlur bad kyntu ia ki jaka pule kiba ioh jingkyrshan na ka sorkar ba kin pynbun ia ka jingpynrung klas bad ban sdang ruh ia ki klas mynstep (morning section) ha ki katto katne ki jaka pule sorkar,” ong u Rakkam da kaba bynrap, “Ngi kwah ban don ia ki rukom treikam kiba la pynbeit ryntih namar kin don sa palat 20,000 ngut ki samla pule mynta u snem. Ngi dang pynkhreh ia ki jingdonkam baroh halor kumno ngin lah ban pynrung klas ia baroh. Ngim kwah ban iohi ba ki samla pule jong ngi kin duh rung klas.”

Haba pyntip ba la pynsangeh shwa ia ka jingpynrung klas, u Myntri u la ong, “Ngi la don ha ka kam bad ngi la pynsangeh shwa ia ka jingpynrung klas ha kiba bun ki jaka pule bad hadien ba ngi la ioh jingkhein haduh katno ngi lah ban pynrung l;as ia ki samla pule hapoh ki district, East Khasi Hills, Ri Bhoi, Jowai. Ngi dang pynkhreh ia ka rukom treikam kaba la pynkhreh ryntih khnang ba ngin lah ban pyntip sha ki samla pule ba haduh katne ngi lah ban pynrung klas hangne hangtai.”

Haba kylli, u Rakkam u la ong ba ki don sa sawtylli ki Secondary School ia kiba yn kyntiew kyrdan sha ka Higher Secondary School, kata laitylli ha Rilum Khasi bad Jaintia bad kawei ha Rilum Garo.

“Ngi la iakynduh ia ki jaka pule bapher bapher ban iakren la ka jingpynrung klas ka la dap ne em, balei ba ym sdang ia ka klas step lane wanrah la ka jong ka section. Ngin pynthikna ba baroh ki samla kiba pass kin ioh rung klas ha ka jylla,” u la ong.

Iehnoh kam ka Prof Sungoh kum ka Pro-VC, tyrwa ban shimti kum ka VC (Incharge) ka NEHU