Ar tylli ki hattrick khyrwit u Risanlang 9 kol pynbam ka Mowtyrshiah iaka Khliehmyntdu Neinchnong

Syllad | The Rising MeghalayaApril 30, 2022

U Risanlang Dkhar marwei ula khyrwit haduh ar tylli ki hattrick kaba la pynlong iaka Maitshaphrang Mowtyrshiah ban jop haduh 9-1 kol pyrshah iaka Khliehmyntdu Neinchnong haka jingïakhun Third Division Football Tournament kaba pyniaid da ka West Jaintia District Sports Association (WJDSA) kaba long haka sngi Thohdieng ha Kiang Nangbah Stadium.

Kane ka jingiakhun hadpeng kine ki arliang mamla, kala kylla long kaba jem shiliang bad shikol ka Khliehmyndtu kala thep haka minit kaba 31 lyngba u Monlang Kyndait hadien kaba la shah tam da 3 kol shakhmat.

Ia kine ki 9 tylli ki kol la thep da u Sanborlang Tang (2), u Rangdaman Laloo (13), u Kitlang Lathong (2) bad u Risanlang Dkhar (33, 54, 68, 70, 72 bad 77).

Haka jingïalehkai kaba nyngkong ka jingïakhun ka la long kaba ïakhaid da mar 3-3 hapdeng ka Lumkhangdong Kyndongtuber pyrshah ïaka Saindur Mihmyntdu.

Ïaka lai tylli ki kol ka Saindur Mihmyntdu la thep da u Chanmiki Chyrmang (22) bad u Dapmain Phawa (45, 56). Katba ïaki kol ka Lumkhangdong Kyndongtuber la thep da u Rikermi Phawa (30), u Hailan Shylla (69) bad u Request Shylla (70).

Haka jingiakhun hadpeng Ïong I dahi FC pyrshah iaka Myrjai, ka Iong I Dahi kala jop da 2-1 kol. Ïa kine ki kol nakaliang ka Iong I Dahi FC la thep da u Iolang Sana (65,79) marwei ar kol, ka Myrjai ka la thep haka minit kaba 77.