Ar snem hadien ka jingwan lyngshop ka khlam sdang biang iaka Shillong Premier League

Syllad | The Rising MeghalayaJune 14, 2022

Kum ka jylla kaba u paidbah u da ieit bad shongshit bha ia ka phutbol un dap da ka mynsiem kaba sngewkmen ba na ka liang ka Shillong Sports Association (ka synjuk ialehkai ba la jam palat ia ka spah snem ka rta ba la seng ia ka) ka la shim ia ka sienjam ba kan pynlong ia ka lympung bah ialehkai phutbol khraw nam tam ha ka jylla kaba mynta ka kynti yn tip ia ka kum ka Officer’s Choice Blue Shillong Premier League, ban iakhun da ki phra tylli ki kynhun.

Kane ka lympung bah ialehkai bna nam kaba dei ruh ka rynsan ba juh plie lad bha ia ki khun samla ba don ka sap ba nylla ban phrang shuh shuh ia la ka jingim ialehkai ha ka jingim, kan sdang naduh lashai ka sngi, da ka jingiakhun ka ban long hapdeng ka Mawlai Sports Cub bad ka Nangkiew Irat Sports Club.

Mynta ka kynti, ia kane ka lympung ialehkai, ka SSA kam banse ba kan hap ban pynlong ia ka ha MFA Turf, Third Ground Polo ka ban sdang ha ka por 4 baje nohphai sngi.

Haba phai sha ki jingpynkhreh pynkhrum, ha kane ka sien jam kaba mynta ka SSA hapoh ka jingialam ka jong u samla rangbah ba dei u nongmihkhmat (MLA) ka Mawphlang Constituency u bah Eugeneson  Lyngdoh, u General Secretary u bah S.S Rapthap, ka kynhun jong ka Tournament Committee bad  baroh ki dkhot  ka SSA, ki la tylli mlon kawei ban iaid beit shakhmat ban pynlong ia ka SPL.

Namar ka jingbym pat lah ka SSA ba kan ioh ia ka bhah kyrpang na ka sorkar ban siang ia u artificial turf, ka synjuk ka la pynkhreh ia ki jaka ban ioh ban shong peitkai ka jong ki paidbah kaba la shu shna shipor da ka siej, haka bynta jong ka, kaba don markhap bad ka kynroh ka madan ialehkai kriket ka JN Stadium Polo, kane ka kren shai ba haduh katno, na ka liang ki nongkit kam ka SSA, ki pyrkhat lem ia u paid ba ieit bad ba sngewtynnad ban wan ban peitkai ia ki lympung ialehkai ia baroh shi kata tylli ki lympung ka SSA ka la pynlong ha kane ka madan.

Hynrei uwei na ki mawmer ban sah nam pateng la pakit ha kane ka samoi ialehkai ba mynta jong ka SPL ka dei ka jingwan ban mih shakhmat u samla rangbah u bah Samborlang Diengdoh lyngba ka shap ne ka muhor jong ‘SAMKHAMTI’ ban iarap ia ka lad pathai khubor t7 news ba kan shim ia ka bynta kum ka official broadcaster na ka bynta kane ka lympung, ha kaba yn pyrshang naka bynta ban ai ia ka live stream na ka bynta ki baroh ar kylla jong kane ka jingiakhun.

Da kumta arsnem hadien jong ka jingbym lah ban pynlong, ka SPL kane kan wan ba kan mih paw bad kaei kaba ia thrang bad sliang dik dik ka mynsiem hi ka long kumba u bah Banteidor Lyngdoh, myntri ba dei khmih ia ka tnat Sports & Youth Affairs, u la khlei ia ka juban lak ban iarap ia ka SSA ban pynkloi naka bynta ban siang noh da u artificial turf, da kumta, baroh ia ap khmih lynti ba ka kylla kaba ar jong ka samoi ialehkai ba mynta ka SPL khlem pep yn sa lah ban pynlong hapoh kut ka madan jong ka First Ground, ka SSA Stadium, ha Polo.