Ar ngut ki khynnah ialehkai ka Ryntih FC uba na Sutnga bad Mawkalum kin leit shah hikai sha Spain

Syllad | The Rising MeghalayaJune 13, 2023

U Kynsai Kupar Bareh (16 Snem) na  ka shnong Sutnga, East Jaintia Hills District bad u Federick Kupar Kupar Kurbah (17) na Mawkalum, Ladmawreng, East Khasi Hills ki long ki arngut ki khynnah ialehkai Phutbol, kiba shen kin khreh ban leit shah hikai shuh shuh haka liang ka jingialehkai phutbol ha kawei ka shlem ba la tip kum ka Rush Football Academy ba don ha sorbah Valencia, Spain.

Ha lyndet ka jingioh lad u Kynsai bad u Federick ka la wan hadien ba ki la leit ban iashim bynta sha kawei na ki prokram ban jurip ia ka sap ialehkai ba nylla ki khynnah na kane ka jylla ba la lah ban wanrah ia ka da ka Ryntih Football Club ia ka kynhun jong ka Max Sports  Academy, kaba la shim ia ka sienjam ba kan pynlong ia kum kine ki prokram ha ki lai tylli ki jylla kum ka Delhi, Odisha bad Meghalaya.

Haba kren bad u Wanllam Kupar Kharpran jong ka Ryntih FC, u pynpaw ba na ka liang kane ka kynhun ka la lah ban the ia ka soskular bad ka Max Sports Academy, namar ka shem ba ka don ka lad ka lynti, katno tam lei lei hadien ba la ioh jingtip ba ka Max Sports Academy ka don ia ka jingiadei kaba iajan bha bad ki kato katne ki club ba don ha Spain bad Portugal.

U Wallam u iathuh ba ha kane ka jingpyrshang la wan ban iashim bynta da kum,ba 100 ngut ki khynnah, ha kaba na kine ki spah ngut ar ngut katta u Kynsai bad Federick ki la shah jied, daka jingkhmih lynti artad ba kine ki anrgut ba la shah jied kin lah ban leh bha ynda haba ki la poi ban iuh kjat ha Valencia ne wat haduh ba kin da lah ban shah jied ban iakhun ha ki lympung ialehkai jong ka 4th ne 3rd division  ha Spain.

Nalor katta u Wallam u la ong ruh ba  mynta ka kynti ka jingpynlong ia kum kane ka prokram ka dei tang ka sien jam ba nyngkong, ia kaba u khmih lynti ba yn sa lah ban pynlong biang ruh sa kawei pat ka prokram kaba ka jingjiaid ia ki khynnah kan dei pat naka bynta ban ioh shah hikai ne ban pyntbit sha Portugal.

Ka prokram kan nym kut eh tang ha kaban jied ia ki player, hynrei u Wallam u pynpaw ba kan  sa don ruh ka prokram ban lah ban jied wat ia kito ki samla rangbah ba kwah ban pyntbit ia ka lain ban long kum ki coach ha kaba ki lah ruh ban ioh wat ia ka license jong ka UEFA.

Image Credit: Ryntih FC