Apil ka Seng Kur Kharsahnoh ban ai jingiada iaki nongniah kali kamai

Syllad | The Rising MeghalayaSeptember 10, 2022

Ka Seng Kur Kharsahnoh Central Body Shillong kala apil iaka sorkar Jylla bad ka tnad pulit ka jylla Meghalaya ban pynthikna ban ai jingiada iaki nongniah kali kamai ban shngaiñ ka leit ka wan jong  ki ban lait na kino kino ki kam sniew ha ki sngi ki ia ban wan.

Haka shithi sha u Deputy Commissioner, West Jaintia Hills Batlang S Sohliya, IAS ka Seng Kur Kharsahnoh kala pynithuh ialade bad kadei ka seng kaba peit iaka bha ka miat jong baroh ki jait kur Kharsahnoh ha baroh kawei ka rilum Khasi Jaintia.

Kala iathuh halor ka jingshah rahbor bad shah pyniap dusmon u Fullmoon Kharsahnoh, uba na Larnai, West Jaintia Hills bad haka juh ka por ka jingshah tuh kali jong kaba don u registration number ML04 D 1113.

Pule | Shah kem u I Love You ba donkti ban pyniap ia u nongniah kali, lap iaka metiap na Jowai Bypass

Ka seng kur kala pynpaw iaka jingpyrshah hakhmat ka bor synshar district jong ka West Jaintia Hills bad hakhmat ka sorkar jylla halor ka jingjia shah rahbor bad shah pyniap u Fullmoon Kharsahnoh

Ka seng Kur Kharsahnoh kala dawa ban pynioh iaka jingbishar kaba hok iaka longiing u (L) Fullmoon Kharsahnoh lyngba ka bor synshar district, ka iingbishar bad kumjuh ban pynsted iaka jingtohkit ia ki suba donkti katkum ki kyndon jong ka aiñ bad ban ai ka jingpynsaja kaba tyngeh ia kine ki riew thrangsnam.

Ka kur kala apil iaka bor synshar district bad ka sorkar ban shimkhia ia kane ka kam khnang ban ai ka jingbishar kaba hok iaka longiing u Fullmoon Kharsahnoh.

Pule | Tylli mlon u paidbah ka kur ban dawa pynkut iaka raibi u Tellme I Love You & ka kynhun

Shuwa ban aiti ia katei ka shithi ban apil iaka bor synshar district ka West Jaintia Hills bad ka Sorkar, ki nongialam bad ki dkhot ka Seng Kur Kharsahnoh kala pynlong ruh iaka jingialang ha Ummulong, West Jaintia Hills District haka sngi Thohdieng.

Ïaka jingïalang la pynïaid da u president u Bah Soren Kharsahnoh bad la ïoh ka jingkren lamkhmat na u Secretary u Bah EW Kharsahnoh bad ka la don ka jingsngap jar kaba shi minit.  La ïoh ka jingkren lyngkot na u president Jaintia Unit u Bah Kishon Kharsahnoh, u Secretary Jongsha Unit u Bah Olet Kharsahnoh.