Angnud ka shnong Umlyngsha ban pynkylla jaka jngohkai ïaka fish sanctuary ha wah Sailynter

Syllad | The Rising MeghalayaSeptember 26, 2021

Ka Dorbar Shnong Umlyngsha, East Jaiñtia Hills kala pynpaw iaka jingangnud ban pynkylla iaka Wah Sailynter kaba la ai jingiada bad la pynkylla fish sanctuary naduh u snem 2019 kum ka jaka jngohkai ban khring iaki nongshang kai suwari.

U Namphrangmi Talang, Waheh Shnong, Umlyngsha ula iathuh ba ia kane Sailynter fish sanctuary ka dei ka fish sanctuary kaba nongkong eh hapoh East Jaintia Hills kaba la pynbna ha ka 5 tarik Nohprah (December) 2019 da u Bah FM Dopth, DC barim ka district lyngba ka jingmynjur lang ka Dorbar shnong Umlyngsha.

“Kane ka sanctuary mynta kala kharoi bha ki dohkha bad kiwei ki jingim hapoh um bad la ai jingiada ba kyrpang iaka sawdong sawkun ka fish sanctuary. Mynshwa katba ka shnong kam pat pynkylla fish sanctuary ia kane jaka, ki dohkha ki don hi hynrei kamdei pat kumba long mynta,” la ong u waheh shnong Umlyngsha.

U Namphrangmi ula kyntu iaka sorkar jylla khamtam ia ka bor District jong ka East Jaintia Hills ban pynlong ia kane ka jaka ri dohkha kum ka Aqua Park hapoh ka District.

“Ngi kyrpad ruh ia ka sorkar lyngba ka bor synshar District na ka bynta ban pynioh ia kine ki jingdonkam kum ban shna ia ki lynti iaid kjat, ka Jingkieng iaidkjat, ki jaka shongkai pynngad, ki lieng na ka bynta ban buh ha kane ka fish sanctuary khnang ban khring ia ki riew jngohkai pyrthei khamtam ia ki riew ieit dohkha,” la Namphrangmi.

Ula ong ruh ba kane ka Wah Sailynter ka don haduh saw tylli wah rit ba tuid shaka kiba tip kum ka Wah Umpyrjaw, Wahsiej, Wah Umpliang bad Wah Ratap.

Nakaliang ka shnong kala buh ki jingmana ban khang pyrshah iaki briew ban pynjakhlia bad ban pyniap pathar iaki dohum dohpnat bad ban pom iaki dieng ki siej.