Amphan | Pynbna u MLA Jowai T.40 lak yn iarap iaki nongrep, donkam T.15 klur ban maramot ha West Jaintia Hills

Syllad | The Rising MeghalayaJune 1, 2020

U MLA jong ka Jowai u ma Wailadmiki Shylla haka sngi Nyngkong ula pynbna ba un theh ka lad jingiarap sha ki paidbah nongrep haduh T.40 lak naka MLA Scheme bad T.15 Klur pat yn maramot iaka jingpynjulor jong ka eriong Amphan kaba la wan lyngshop haka West Jaintia Hills District haka 26 tarik u Jymmang 2020.

Ia kane jingkhein yn sa rah bad pynsngew sha u Chief Minister, khnang ban ioh jingiarap ban maramot ia kaba la puynjulor ka bor mariang, ong u ma Wailadmiki.

U Ma Wailadmiki Shylla ula ong ba ki paid nongrep hapoh ka district kila shah ktah bha kumjuh ki jingtei naduh ki ïingskul bad surok ha kane ka jingwan lyngshop u slap kaba la wanrah ka jingshlei um bad jingtwa.

“Na kaliang jong nga kum u MLA ngan pyllait T.40 lak sha ki nongrep, kata mar T.5 hajar kawei ka longiing jong ki nongrep ba shah ktah,” ong ma Wailadmiki Shylla hadien ka jingialang ban shim jingkhein iaka jingjulor kaba la pynjulor u slap bad ka lyer haka Review Meeting jong ka Disaster Management Committee jong ka district kaba long ha Conference Hall u DC, Jowai

Ha kane ka jingialang la iadolang baroh ki ophisar jong ki tnad bapher bapher nalor u MLA bad u Deputy Commissioner, West Jaintia Hills District ma Garod LSN Dykes.

U MLA Jowai ula ong ba ha kane ka jingshim jingkhein halor ka jingpynjulor ka mariang tang ka surok kaba peit ka tnad PWD Central Division ka jingjulor kala kot T.2.8 klur, Ka PWD North Division T.3.5 klur, ka PWD South Division T.1.8 klur. Nalor ki surok PMGSY T.49.54 lak kaba hap haka surok Chyrmang bad Iongnoh.

Shuh shuh u MLA ula ong ruh ba ki nongrep ruh kila shah ktah haduh 35 percent.

“Ban pynioh ki lad jingiarap ba shipor ia ki paidbah nongrep ha kana ka jingshah lyngshop bor mariang bad ka jingiakhun khlam COVID-19, nga la rai ban synniang T.40 lak naka MLA skhims sha ki 800 ngut koi paidbah nongrep hapoh ka Jowai Constituency,” ong u MLA ma Wailadmiki Shylla.