Aiti u CM ia ka Sports Scholarship sha ki 614 ngut ki nongialehkai

Syllad | The Rising MeghalayaMay 2, 2025

U Myntri Rangbah ka Jylla u Conrad K Sangma ha ka 1 tarik Jymmang u la aiti ia ka Chief Minister’s Sports Scholarship Scheme sha ki 614 ngut ki nongialehkai na ki jait ialehkai bapher bapher jong u snem 2022-2024 bad 2024-25 ha ka jingialang kitbok kitrwiang iaki nongialehkai ban leit mihkhmat ia ka Jylla sha ka Khelo India Games, 2025 ka ban long ha Bihar naduh ka 4 haduh ka 15 tarik Jymmang.

Kane ka skhim ka thmu ban kyrshan bad pynroi ia ki sap ki phong ha ka jylla. Ha kine ki hynriew snem ba la dep ka sorkar ka la bei tyngka na ka bynta ki jingtei ia ki jaka ialehkai sports, ka jingwanrah ia ki policy ban kyntiew ia ka sports. Kane ka skhim bathymmai kan nangkyntiew shuh shuh ia ki nongialehkai ba kin lah ban paw ha ki lympung ialehkai jong ka ri bad ban tei ka nongrim na ka bynta ka jylla ka ban pynlong ia ka National Games in 2027.

Haba kren ha ka jingialang u CM u la ong, “Kine ki scholarship ki ai ka jingithuh halor ka jingtrei shitom bad ka jingaiti lut jong ki nongialehkai jong ngi, ka ban pynshlur ia ki ba kin ioh ia ka jingjop kaba kham khraw bad ban wanrah ia ka nam ka burom ia ka jylla Meghalaya bad ka ri baroh kawei.”

Haba pynkynmaw halor ka jinglong jingman, ha ka por ba ka sorkar MDA ka la shimti ia ka jingsynshar ha u 2018, u Conrad u la ong ba ki kam ialehkai sports kam shym la kiew namar ka jingbym don ia ki policy, ka jingbym biang ki jaka ialehkai bad ka jingduna ki lad aijingkyrshan ha ka liang ka pisa tyngka.

“Ka sorkar ka la shim ia ka sienjam kaba shlur, kynthup ka jingpynkhie im ia ka Meghalaya Games kaba la pynlong tang arsien ha ki 48 snem ba la leit tad haduh u snem 2019. Ia kane ka lympung ialehkai mynta la pynlong na kawei ka District sha kawei pat kaba la kyntiew ia ka jingioh bynta lang bad ban nanglap ia ki sap ki phong jong ki nongialehkai,” bynra u CM.

Nalor kata u la ong ruh ba ka sorkar ka la shim ia ka sienjam ban tei bad kyntiew ia ki jaka ialehkai ha ki jaka sor bad ha ki thain nongkyndong kumjuh, kata da kaba pynleit jingmut ha kaba wanrah ia ki jaka aijinghikai, ki stadium bad ki madan ialehkai ha ki shnong ki thaw.

Da kaba pynpaw ba ka Chief Minister’s Sports Scholarship Scheme ka thmu ban ai jingithuh ia ki sap ialehkai bad ban pynjem ia ka jingkit kaba khia ha ka liang ka pisa tyngka na ka bynta ki nongialehkai, u Conrad u la kubur ba ka jingkyrshan pisa kam long kaba heh, hynrei ka jingkyrshan kaba rit ruh ka lah ban wanrah ia ka jingkylla kaba khraw haba nang ban pyndonkam hok. “Ka Scholarship kam dei tang halor ka pisa, hynrei ka dei ka jingithuh,” u la bynrap.

Shuh shuh u CM u la shim ruh ia ka kabu ban pyntip ha ka jingialang halor ka jingpynkhreh kaba la iaid shakhmat na ka bynta ban pynlong ia ka National Games ha ka jylla ha u snem 2027.