Aiti u CM ia ka song jingiarap pisa ba T.1 klur sha ka Nazareth Hospital ban nangpynbha ia ka jingshakri

Syllad | The Rising MeghalayaMay 8, 2025

U Myntri Rangbah ka Jylla u Conrad K Sangma haka sngi Balang u la aiti ia ka song jingiarap pisa kaba T.1 klur sha ka Nazareth Hospital, Shillong khnang ba kan nanglah ban kyntiew bad pynbha shuh shuh ia ka jingai jingshakri sha ki paidbah khamtam kito kiba wan na ki longiing kiba duna ha ka ioh ka kot.

Haba kren ha ka jingialang u CM u la ong ba na ka liang ka sorkar ka kut jingmut skhem bad phaikhmat bha ban kyntiew ha ka liang ka koit ka khiah wat hapdeng kiba bun ki jingtynjuh.

“Ka Meghalaya ka dei kaba bhah bun eh ka mang tyngka na ka bynta ka koit ka khiah haba ia nujor bad kiwei pat ki jylla hapoh ka ri, bad bun na kane ka mang tyngka ka dei kaba la mang ban tei pynbha ia ki jingtei,” u la ong.

“Ka thong ka jong ngi hi ha kaba kut ka iai neh kumjuh, kata ban pynioh ia ki lad jingsumar kaba bha, kaba thikna bad kaba lah ban kot bor na ka bynta ki paidbah bad kane ka dei ka bynta kaba ngi lah ban iatreilang bad ki hospital bapher bapher,” u la ong da kaba pyntip ha ka jingialang shaphang ka jingsdang bad ka jingpynwandur ia ka Meghalaya Health Advancement Policy.

Haba pynpaw ka jingsngewnguh ia baroh kiba shakri ha ka liang ka koit ka khiah u la ban jur ia ki ba kin iai bteng ban ai ka jingshakri da ka jingieid bad ka jingsngewtynnad ia ka kam bad ka jingaiti lut. U la ban jur ruh halor ka jingdonkam ia ki hospital ba kin don ia ka jingiatreilang hapdeng jong ki ym tang ban pynjanai tang halor ki rukom aijingsumar hynrei ban nangkyntiew ia ka jingiatreilang hapdeng ki riew shemphang ha ka liang ka koit ka khiah.

Na ka liang ka Administrator ka Nazareth Hospital, ka Noreen ka la pynpaw ka jingsngewnguh ia ka Sorkar Jylla halor kane ka jingai jingkyrshan pisa bad pynpaw ruh halor ki jingdonkam jong ka hospital ia ki lad jingiarap pisa ban thied ia ki kor ki bor jingsumar ki ban iada ia ka jingim briew ne lifesaving bad ki ventilator na ka bynta ka Emergency Trauma Unit, Maternity Care bad ka Neonatal Intensive Care Unit bad ruh ban pyndonkam na ka bynta ka College of Nursing ka ban sa wan ka ban pdiang haduh 100 ngut ki samla pule ha ka shi snem.

Kiwei pat kiba la ia don lang ha kane ka jingaiti ia ka cheque ki kynthup ia u Commissioner & Secretary, Dr Joram Beda, NHM Mission Director, Ramakrishna Chitturi, Auxiliary Bishop ka Shillong, Fr Bernard Laloo bad u Vicar General, Fr Richard M Majaw nalor kiwei kiwei kiwei.