Aiti u CM da ki smartphone sha ki nongtrei Anganwadi ha EGH ban kyntiew ia ka jingshakri

Syllad | The Rising MeghalayaMay 27, 2025

U Myntri Rangbah ka Jylla u Conrad K Sangma haka sngi ba Ar u la aiti ia ki smartphone sha ki nongtrei Anganwadi ha ka jingialang kaba la long ha St George Higher Secondary School ha Samanda, East Garo Hills ha ka jingiadon lang u Myntri ka tnad Social Welfare u Bah Paul Lyngdoh bad u Myntri ka tnad PHE u Marcuise Marak.

Ha kane ka jingialang la wan iashim bynta da ki nongtrei Anganwadi na kylleng ka thain East Garo Hills kiba la ioh ban pdiang ia kine ki smartphone.

Haba kren ha ka jingialang, u Myntri Rangbah u la ong ba kine ki smartphone kin iarap ban nangkyntiew bad pynjanai ha ki jingtreikam bad ka jingai jingshakri jong ki nongtrei Anganwadi.

Ka Ministry of Women and Child Development ka la bei tyngka T.6 klur na ka bynta ban thied haduh 6,162 tylli ki smartphone na ka bynta ki nongtrei Anganwadi ka ban kyrshan ia ki ha ki bynta jong ka jingtreikam ba kongsan.

U Conrad u pyntip ruh ba la thep ia ka POSHAN App ha kine ki smartphone ha kaba ki nongtrei Anganwadi kin pyndonkam na ka bynta ban buh jingthoh bad ki jingtip nalor kiwei pat ki kam ba iadei bad ka jingaiti ia ki kaiphot ka ban pynthikna ban khmih bniah halor ka jingpyntreikam ia ki skhim kiba iadei bad ka bha ka miat ha ka imlang ka sahlang.

Nalor kata u pyntip ruh ba ki nongrei Anganwadi kin sa ioh ruh ia ki jingsiew na ka bynta ka jingkhmih bniah kaba man ka por halor ka jingheh jingsan jong ki khynnah haduh ka rta 6 snem da kaba thew ia ka jingjrong bad ka jingkhia bad ban thep ia ki jingkhein baroh ha ka POSHAN Tracker. 

Ha kane ka jingialang u Myntri Rangbah u la sam ruh ia ki IIT Innovation ECO H2O Filters sha ki Anganwadi Centre da ka jingthmu ban pynioh ia ka umbam umdih kaba khuid na ka bynta ki khynnah ha ki jaka nongkyndong.

Nalor kata u la plie paidbah ruh ia ka jingtei kaba thymmai jong ka St George Higher Secondary School, Samanda da kaba aiti ia ka sha ki khynnah skul da kaba pynpaw ia ka jingkyrmen ba kan aimynsiem ia ki ha ki jingpule bad ka jingkiew shaphrang. Hadien u la aiti ruh ia ki M-Tab sha ki khynnah skul.