Aiti ka tnad Veterinary ia ka jaka shoh doh ha Demthring sha ka JLBWA bad DS Demthring

Syllad | The Rising MeghalayaApril 30, 2025

Ka Tnad Animal Husbandry & Veterinary ka sorkar Meghalaya ha ka 29 tarik Iaiong kala aiti noh ia ka jaka shoh doh ne slaughter house kaba don ha ka shnong Demthring sha ka Jaintia Livestocks Butcher’s Welfare Association (JLBWA) bad ka Dorbar Shnong Demthring, West Jaintia Hills ba kin pyniaid katkum ka juk kaba mynta da kaba khuid kaba suba.

Ia kane ka jaka shoh doh ne ka Bi Species Abattoir la shna da ka tnad Veterinary jong ka sorkar Meghalaya lyngba ka Central Scheme kaba kot T. 7 klur tam, bad la plie ia kane ka jaka otdoh da u Bah AL Hek Myntri ka tnad AH & Veterinary ha ka 19 tarik Noprah 2023.

Hynrei, ha kane ka sngi ka tnad Veterinary kan aiti noh ia kane ka jaka otdoh ryngkat ka MOU sha ka Jaintia Livestocks Butcher’s Welfare Association bad ka Dorbar Shnong Demthring ban pyniaid ia ka.

Ia kane ka MOU la aiti da ka Dr. M Kharshandi Director AH & Veterinary sha ka JLBWA bad ka Dorbar Shnong Demthring WJH ha ka jingiadon lang i Dr. WMW Khongwir Joint Director, i Dr. A Chyne Deputy Director, i Dr. E Passah Assistant Director bad Bah K Mawlong EE (CEW) AH & Veterinary Jowai.

Katba na ka liang ka JLBWA la wan ban shimti ia kane ka MoU da u Bah Lewis Pyrtuh President bad u ma Dayoolangki Ryngkhlem General Secretary bad na ka Dorbar Shnong Demthring pat la wan shimti ia ka MoU da u ma Elword Ryngkhlem Rangbah Shnong bad u ma Turchwamiki Ryngkhlem Secretary shnong.

Naduh kane ka sngi kane ka jaka shohdoh ka la sdang ban treikam bad ka rukom shohdoh kala long kaba khuid kaba suba namar ki la hap ban bud katkum ki kyndon aiñ kiba ka tnad Veterinary ka la buh hashwa ba kin shoh doh ia ki masi ne ki sniang ia kiba dei ban peit bniah shwa da ki doktor khnang ban pynthikna ba ki dei kiba shait ba khlaiñ ne kiba bit ban pyndonkam da ki briew ha kaba bam ia ki.

Katkum kane ka MoU ka Tnad Veterinary ka la shna ia ka jaka shoh doh kaba katkum ka juk ha Demthring Jowai kaba lah ban shoh haduh 50 tylli ki masi bad 100 tylli ki sniang ha ka shi sngi da ka jingthmu ban pynbiang ia ki nongbam doh jong ka sor Jowai ia kiba lah ban pynbiang ha ka rukom kaba khuid ba suba.

Kane ka jaka shoh doh ka la don lut ia ki jingdonkam kiba kongsan, kata kum ka jingpynbiang um, ka bording, ka ophis bad kamra buh mar, ka jaka pynkhuid ia ki um jakhlia, ka jaka buh ia ki masi bad sniang, ka jaka pynkhriat, ka jaka shoh kaba la ka jong na ka bynta ki masi bad sniang.

Baroh kine ki jingtreikam kin hap hapoh ka jingkhmih da ki ophisar jong ka Tnad Veterinary khnang ban pynthikna halor baroh ki jingbit jingbiang.

Katba ka tnad Veterinary ka la mynjur ia ka jingiateh kaba na ka bynta 10 snem sha ka JLBWA bad DSD katkum ki kyndon ba la kdew ha ka MoU, ka Tnad kan ailad ia ka jingpyniaid ia baroh ki jingtreikam sha ka JLBWA bad DS Demthring, hynrei ka jinglong trai ia ki jaka puta, ki jaka wah ia ki mrad (masi, sniang), ki mashin lem bad kiwei pat ki jingdon jingem ba la pynbiang da ka JLBWA bad DSD dei ban buh dor hok lada hap shimti noh da ka tnad ynda la kut ka por ai wai.

Ka bynta jong ka DS Demthring ka long ban khmih halor ki jingtreikam jong ka JLBWA, ban pynbeit ia ka jingkhein halor ki pisa ba la lum lyngba ka jingnoh synniang jong ka JLBWA T.1.00/Kg, da kane ka pisa ka DS kan sumar bad maramot ia ka jaka shoh doh, ka jingsiew ia u nongpyniaid ne operator bad ka bai bording. Ka Dorbar shnong kan thaw ia ka committee kaba don 3 ngut ki dkhot na ka DS, 4 ngut ki dkhot na ka JLBWA bad uwei u nongmihkhmat na ka Tnad Veterinary, ka jingbud ryntih ia ki ain ban tehlakam ia ka jingjaboh bad ka bor na ki bor ba dei peit na ka bynta ban pyntreikam ia ka jaka shoh doh.

Katba ka jingkitkhlieh jong ka JLBWA ka long tang ki briew kiba la ai bor ban rung shapoh ka  jingtei jong kane ka jaka shoh doh da kaba peit bha ia ki kot ki sla jong ki jong ki nongtrei ne ki trai la leh ha ka khyrdop, ka jingbud ryntih ia ki ain treikam, ki ain pynneh pynsah ia ki jingbam bad ka jingkhanglad ia ka jingtohmet ia ki mrad, ka jingshngain jong ki briew ha kane ka jaka katba ki dang pyntreikam ia ki mashin bad ki tiar elektrik, ban ym bret ia ki jaboh bym pat pynkhuid sha ki jaka ba marjan, ka jingnoh synniang sha ka DSD kaba long T. 1.00/Kg bad ka jingthung ia saw ngut ki dkhot sha ka committee.

Katba ka bynta jong ka tnad Veterinary ka long ba ka tnad ka lah ban ai jingmut ha kano kano ka por ba donkam sha ka committee, ka jingpeit bniah kyllum ia ki nongtrei ka shong ha u nongpyniaid jong ka District A.H. & Vety Officer- Jowai bad ka jingpyniaid ia ka koit ka khiah jong ki mrad kynthup ia ka jingpeit bniah ia ka jingiap bad hadien ka jingpyniap ia ki mrad, ka jingleh ia ki eksamin yn khmih da ki Doktor Veterinary ba la thung da u Director.

Ha kaba iadei bad ki kam pisa la rai ba yn ym don kano kano ka Security deposit na ka JLBWA bad ka DSD ha ka liang jong u Director namar ïa ka jaka la ai sngewbha da ka Dorbar Shnong, Demthring WJH. La ïakut ba ym dei ban thep ïa kano kano ka Net Profit sha ka pla tyngka jong ka Sorkar da ka JLBWA bad ka DSD, ka dor jong ka jingnoh synniang da ka JLBWA ka long T. 1.00/Kg) lah ban pynkylla na ka por sha ka por.