Aiti ka JHDS bad ka Khublei Germany iaka iing bala dep shna sha ka longkmie ha ka shnong Mihmyntdu

Syllad | The Rising MeghalayaOctober 28, 2023

Ka Jaintia Hills Development Society (JHDS) ryngkat ka jingiatreilang bad ka Khublei Germany kila plie paidbah sa ia kawei pat ka iing baduk kaba la tei kyrpang na ka bynta ka iing ka sem jong ka Kong Smiti Phawa ba shong ba sah ha Lumpyrdi Mihmyntdu.

Ia kane ka iing la plie iaka da u Chairman ka Balang Katholik Mihmyntdu, u Ma Lamshwa Chyrmang haka jingdonlang u Director ka Jaintia Hills Development Society Father Manbha Pakem, u Ma Denis Kurkalang Coordinator Jaintia Hills Development Society, u Ma Ialammi Lyngdoh, General Secretary Balang Katholik Mihmyntdu, u Ma Fedrick Synnah ryngkat bad kiwei de ki riew rangbah.

Ia kane ka iing la shna bad pynbit pynbiang da ka Jaintia Hills Development Society ryngkat ka jingkyrshan kawei ka Longkmie kaba na ka Ri Germany ka Agathe Glucker.

Shuwa ban plie iaka iing, ka la don ka jingialang lyngkot ba la pyniaid da u Ma Fedrick Synnah Chairman barim ka Balang Katholik Mihmyntdu bad la ioh ka jingkren na u Ma Lamshwa Chyrmang bad na u Father Manbha Pakem bad ka jingkren sngewnguh na ka trai-iing ka Kong Smiti Phawa.

U Father Manbha Pakem haka jingkren ula pynpaw ka jingsngewnguh ia baroh kiba donkti bad kyrshan ban pynshna ia kane ka iing kaba donkam jingiarap bad u la kyntu ruh ia ki nongioh kynti ba kin sumar bha ia kane ka iing khamtam eh ban don ka jingiaieid ka jingiasngewthuh jingmut shi iing shi sem khnang ban wanrah ia ka longing longsem kaba bha ba miat bad basuk basain.

Hadien ka jingkyrkhu ia ka iing da u Father Manbha Pakem, la ioh ia ka jingkren sngewnguh na ka liang ka Kur Phawa ia kaba la kren da u Ma Sahon Phawa President ka kur Phawa Mihmyntdu Unit uba la pynpaw ka jingsngewnguh ia kiba donkti ban pynshna ia katei ka iing.