Ailad biang ka Dorbar Shnong Umshangling ban wan bret niut hadien ka jingwan jurip u DC bad NTC

Syllad | The Rising MeghalayaJune 17, 2025

Ka Dorbar Shnong Umshangling ka la mynjur ban shah biang ia ka jingwan bret ia ki niut ki nier kiba mih na ki shnong kiba don ha ka sor Nongpoh hadien ka jingwan jurip u Deputy Commissioner ka Ri Bhoi u Abhilash Baranwal ha ryngkat ki nongialam ka Nongpoh Town Committee (NTC) bad hadien ka jingialang kaba la long haka Nyngkong ha ka jingiadon lang u MLA ka thain u Bah Marylborn Syiem.

Lah ban kdew ba ki shnong kiba hap hapoh sor Nongpoh ki la iakynduh ia ka jingeh kaba khraw naduh hadien ba kim shym la lah ban leit theh ia ki niut ki nier naduh ka 12 tarik mynta u bnai hadien ba ka Dorbar Shnong Umshangling ka la mih ban khang pyrshah ia ka jingwan bret niut naduh ka 11 tarik Jylliew namar ka jingbret pathar kaba wanrah ka jingjaboh bad ka jingsma iwtung bad kaba ktah ruh ia ka koit ka khiah jong ki nongshong shnong.

Ha katei ka jingleit jurip ka kynhun ba la ialam da u DC ha ka jingiadon lang u MLA ka thain la ia don lang ruh ki ophisar na ka Tnar Urban, ki Rangbah Shnong, ki dkhot ka ka Synjuk ki Rangbah Shnong na ki phra tylli ki shnong nalor ki nongialam na ka shnong Umshangling.

Ha kane ka jingleit jurip la lap shisha ia ka jingbret niut pathar da ki kali kiba wan theh na ki shnong bapher bapher kaba la pynkhein ruh ia ki kyndon ba la buh. Ia kane ka jaka theh niut ym shym la pyntreikam ha ka rukom kumba la thmu, bad kumta ka jingkhang pyrshah jong ka Dorbar Shnong ia kane ka jingwan theh niut ka long kaba shong nongrim.

Ha kane katei ka jingialang u DC ula ai ka jingkular ban pyntreikam ia ki 14 tylli ki mat jingdawa jong ka Dorbar Shnong Umshangling kaba kynthup ha kaba iadei bad ka jingshna pynbha ia ka surok kaba pyniasoh sha katei ka jaka theh niut, ban pynkhuid ia ki jaboh bala bret pathar, bad buh arngut ki nongap ki ban peit haba wan bret niut nalor kiwei kiwei.