Aibor ka UDP ha u president ban rai halor ka jingjied ia u general secretary bathymmai

Syllad | The Rising MeghalayaJune 30, 2025

U nongialam ka UDP uba dei ruh u Myntri sorkar u Bah Kyrmen Shylla haka 30 tarik Jylliew u la pyntip ba ka party ka la aibor ha u president, u Bah Metbah Lyngdoh ba un rai ha kaba iadei bad ka jingthung ia u general secretary bathymmai ka party.

“Ha ka jingialang kaba dang shen ngi la ai bor pura ha u president ka party ba un shim ia ka rai ban pyndap noh kloi katba lah ia kane ka jaka kaba thylli,” ong u Bah Kyrmen haba kren sha ki lad pathai khubor.

Na ka liang u president un sa khot pynlong ia ka jingialang ban shim ia ka rai kaba khatduh halor kane ka mat hadien ba u la wanphai sha Shillong.

Lah ban pynkynmaw ba kane ka kam general secretary hapoh ka UDP ka la kylla thylli hadien ka jingiehnoh kam jong u MLA barim ka Nongthymmai u Bah Jemino Mawthoh.

U Bah Kyrmen u pynpaw ruh ka jingsngew bynniaw halor kane ka jingmih noh ba kynsan jong u Bah Jemino, kata da kaba kdew ruh halor ki jingnoh synniang ki jong u halor ka jingkiew jong ka party.

Nalor kata u ngeit ruh ba kiei kiei kiba bha kin wan jia ha kine ki khyndiat sngi ki ban wan bad pynpaw ia ka jingkut jingmut ban nangtrei shitom shuh shuh.

Haba kylli la tang ki MLA kiba lah ban shimti ia kane ka kam general secretary, u Bah Kyrmen u la ong, “Kam don satia kaba kum kata ka kyndon ha ki riti treikam jong ngi bad mano mano ruh ki lah ban shimti kum u general secretary bathymmai.”

Haba kylli la u long ne em uba kloi ban shimti ia kane ka kam, u Bah Kyrmen u la ong, “Ka party kan sarai. Ngi don hangne ban shakri. Kam pher la nga dei ne ngam dei u general secretary. Kano kano ka kyrdan kaba ngi bat, ngin iatreilang na ka bynta ka party.”