Ai khublei u MDC Jowai North iaka Dahun Shisha Lyngdoh ba pass MCS

Syllad | The Rising MeghalayaApril 30, 2021

U MDC jong ka Jowai Noth u ma Brightstar Chyrmang ula ai khublei iaka samla Dahun Shisha Lyngdoh kaba la pass bad kylla long ka namtam da kaba wan haka kyrdan kaba hakhliehduh haka exam Meghalaya Civil Services (MCS) kaba la pynbna da ka Meghalaya Public Service Commission (MPSC) haka 29 tarik une une u bnai.

“Ka jingjop jong kane ka samla ha kane ka exam ym tang ba wanrah burom iaka iing ka sem jong ka, hynrei iaka District baroh kawei. Kane ka dei ka nuksa kaba kiwei ruh ki samla pule kynthei bad shynrang kin duriap haka pule ka puthi ban poi sha ka thong ban jop iaki exam kum haka MCS, IAS, IPS bad kiwei kiwei,” la ong u ma Brightstar.

Ka Dahun Shisha ka dei ka khun jong u Ma Elias Siangshai bad Kong Oisibon Lyngdoh bad kiba shong basah ha Caroline Colony, Jowai.

Wan nyngkong ka samla Jowai haka result MCS

U MDC ka Jowai North ula kitbok kitrwiang bad ai ka kyrkhu kyrdoh ia ka Samla Dahun Shisha ba ioh ka met kaba koit kaba khiah bad iaid shakhmat haka jingim bad ka jingtrei kam jong ka. Ula ai khublei lang ruh iaki 37 ngut kiwei pat kiba pass MCS bad u kyrmen ba kin jop ha ka jingim jong ki ha kano kano ka kam kaba ki trei ki ktah.