Ai khublei u CM ia u PM Modi ba ithuh ia ki Ryndia kum ka shap ka jingriewspah ha ka kolshor ka Jylla

Syllad | The Rising MeghalayaJune 26, 2025

U Myntri Rangbah ka Jylla u Conrad K Sangma haka 25 tarik Jylliew u la ai khublei ia u Myntri Rangbahduh ka Ri u Narendra Modi halor ka jingai jingithuh ia ki jain Ryndia kiba dang shu ioh shen ia ka shap Geographical Indication (GI) na ka bynta ki ‘Eri Silk’ ia kiba la thain da ki longkmie napoh Ri Bhoi District.

Haba thoh lyngba ka X, u Sangma u la ong, “Nga sngewnguh shibun ia u Myntri Rangbahduh ka Ri u Narendra Modi halor ka jingai jingithuh ia ki Ryndia-ka jingioh ia ka GI-tagged ia ki Eri silk ba la thain kti da ki longkmie napoh Ri Bhoi District. Nga ai khublei ia ki nongpynwandur KINIHO kiba la thain pynwandur biang ia ka pateng jong ngi da ka jingsumar bad ka jingtbit.”

U Conrad u la iasam ruh ia ka shithi ba la ioh pdiang na u Myntri Rangbahduh ka Ri, uba la pynpaw ka jingsngewnguh ia u  Myntri Rangbah halor ka jingai sngewbha da ka jain Ryndia kaba dei ka shap jong ka Meghalaya kaba pynpaw ia ki jingdon jingem kiba hiar pateng da ka jingsarong.

U Modi u la pynpaw ruh ha ka shithi ba la phah ha ka 24 tarik Jylliew kaba ong, “Mynta ki briew ha kylleng ka pyrthei ki la nangwad ia ki mar ym tang ba ki pynduna ia ka jingktah ia ka mariang, hynrei kiba la pynmih ha ka rukom tynrai, kaba pynpaw ia ka jingangnud jong ki ri ka pyrthei ban kyntiew ia ka jingpynneh pynsah bad ka jingkitkhlieh na ka bynta ka imlang ka sahlang.Dei ha kane ka nongrim bad ki mar kum ki ‘Ryndia’ ki kylla long kiba pawkhmat. U la kdew ruh ba ka jingai ba dang shen ia ka shap GI ia ki jain Ryndia, ka dei kawei pat ka sienjam ka ban lah ban kyntiew bad pyniaid iew shuh shuh ia kiba kum kine ki mar ha ki rynsan ka pyrthei.”

“Haba nga wan jngoh sha Meghalaya, nga dap da ka jingsngewkmen namar ka jingieid jong ki paidbah, ka jingitynnad jong ka mariang bad ka jingkotbor kaba khlain jong ki samla. Ryngkat lang ngin bteng ban shakri ia ki paidbah jong ka jylla bad ban pynthikna ba ka Meghalaya kan shim ia ka bynta kaba kongsan ban pynurlong ia ka thong ban pynlong ia ka ri kaba kiew shaphrang,” pynkut u Modi.