Ai khublei ka Myntri ka Tnat ka koit ka khiah ia ka Fanwar Faith INC halor ki sienjam ban kyntiew ia ka koit ka khiah

Syllad | The Rising MeghalayaNovember 23, 2023

Ka Myntri ka Tnat ka koit ka khiah ka sorkar jylla ka Dr M Ampareen Lyngdoh ka la pyrto ia ki sienjam ba la shim da ka Fanwar Faith INC bad kiwei pat ki kynhun kiba ia don bynta na ka bynta ban kyntiew ia ka koit ka khiah wat sha ki thain kiba jngai bad kiba kyndong tam.

Ha ka jingleit jurip ia ka prokram aijingsumar ne ‘health camp’ haka 23 tarik Naiwieng ia kaba la pynlong da ka Fanwar Faith INC ha ryngkat ka jingiatreilang bad ka Martin Luther Christian University (MLCU), Jengjal Sub Divisional Hospital, RoUTES bad ka Balang Seventh-Day Adventist ha Madan Pyndeng Mawlieh, Mawshynrut, West Khasi Hills District, ka Myntri ka la ai khublei kyrpang ruh ia Kur Mawsor halor ka jinglong lakloi ban noh synniang da ka lyngkhot jaka na ka bynta ban thaw ia ka skul hapoh kane ka shnong ia kaba yn khmih bad pyniaid da ka Fanwar Faith INC.

Ka Myntri ka la leit jurip ruh ia ki jaka eksamin bad ai dawai bad pynlong ka jingiamir jingmut bad ki doktor kumjuh bad ki nongtrei ka tnat ka koit ka khiah, ki nongai dawai kumjuh bad ki nongioh jingmyntoi lyngba kane ka prokram aijingsumar ei.

Ha ka jingiamir jingmut bad ki doktor hapoh kane ka health camp la pyntip sha ka Myntri ba ka jingpang Shini (Diabetes) bad ka bad ka jingkiew BP (Blood Pressure) ne Hypertension ki dei ki jait jingpang kiba kham kynrei hapdeng ki nongshong shnong jong ka thain.

Na ka liang ka Myntri ka la aijingmut ruh ia ki nongshong shnong ba ki dei ban leit phah check up na ka por sha ka por sha ki jaka aijingsumar kiba hajan tam kum ki Health Sub Centre lane Public Health Center khnang ba kan long ka jingmyntoi kaba khraw na ka bynta ka koit ka khiah kaba neh jong ki.

Shuh shuh ha kane ka prokram la wan iashim bynta ruh da ki doktor napoh Nongstoin Civil Hospital kumjuh napoh Mairang Civil Hospital.