Ai khublei ka MLBA ba shah jied u Khrawbok kum u dkhot na ka bynta ka National Games 2023

Syllad | The Rising MeghalayaNovember 9, 2023

Sa shisien ha ka sien kaba nyngkong ka Meghalaya Lawn Bowling Association (MLBA) ka la ioh pynrung ia u samla Khrawbok Tongper, East Khasi Hills District na ka jylla Meghalaya kum u dkhot ne Technical Official na ka Bowling Federation of India ha ka 37 National Games 2023 kaba la long ha Goa naduh ka 29 tarik Risaw 2023 haduh ka 8 tarik Naiwieng 2023.

U Khrawbok Tongper, u la ioh rung teng kum u nongialehkai ha ryngkat kiwei pat na ka jylla Meghalaya ban iashim bynta ha ka “8th National Lawn Bowls Championship 2023” kaba la long naduh 21 haduh 30 tarik Nailur 2023 ha Guwahati.

Kum shi bynta ban nang pynpaw ia kane ka jingialehkai lawn bowling hapoh jylla Meghalaya ka kynhun Meghalaya Lawn Bowling Association (MLBA) ka la ioh ban phah ia u Khrawbok kum u Technical Official ha ka Lawn Bowling ha ka “37th National Games kaba la long ha Goa.”

Da kane ka jingioh lad jong u samla Khrawbok Tongper la khmih lynti ba kane ka jingialehkai kan ioh lad ban nang paw hapoh ka jylla.

Ka Meghalaya Lawn Bowling Association ka ai khublei kyrpang ia u General Secretary bad President Meghalaya State Olympic Association (MSOA) ia ka jingai mynsiem ka jingiarap jingiakren ban ioh phah ia uwei u Samla Rangbah na ka jylla kum u Technical Official.

“Ngi kyrmen ba nangne shakhmat ka tnad sorkar kin ai mynsiem bad kan kyrshan lem ia ka MLBA ba kan ioh ban pynlong ia ki tornament ki championships bapher bapher hapoh jylla khamtam ba kane ka jingialehkai ka long kawei na ki sports kaba ka jylla Meghalaya kan hap pynkhreh na ka bynta ka 39 National Games hapoh jylla Meghalaya ha u snem 2025 lane 2026,” pynpaw ki nongialam ka kynhun kiba kynthup ia I Kong VN Lamare President bad Kong R Swett General Secretary, MLBA.