Ai khublei ka Jingiaseng Samla KJP Synod Mihngi School, Thangskai ia ka jingnoh synniang ka Dalmia Cement Ltd

Syllad | The Rising MeghalayaApril 23, 2024

Ka Jingiaseng Samla KJP Synod Mihngi School, Thangskai, ka pynpaw ka jingsngew nguh bad ai khublei ia ka jingnoh synniang jong ka Dalmia Bharat Cement Ltd, Thangskai da ki tin tap tnum kiba paka (dynaroof) na ka bynta ka iingskul kaba dang shu shna thymmai ha ka shnong Thangskai, East Jaintia Hills District.

Na ka liang ka Headmistress jong ka skul ka Kong Mebarika Syih lyngba u kyrwoh ka pynpaw ba kane ka jingnoh synniang ka long da shisha ka jingkyrkhu kaba khraw na ka bynta ka Construction-cum-Fund Raising Committee jong ka skul, kaba thmu ban pynbit pynbiang ia ka iingskul na ka bynta ka jingbit jingbiang jong ki khynnah skul.

Ka Jingiaseng Samla KJP Synod Mihngi School, Thangskai ba la mihkhmat da ka Headmistress, u Secretary Bah Elder N. Rymbai bad u Chairman Rev. E. K. Mujat nalor kiwei pat ki dkhot jong ka skul ki la ai ka jingkhublei kyrpang ia ki bor pyniaid jong ka Dalmia Bharat Cement Ltd., Thangskai ba la mihkhmat da u Jitumoni Kalita halor kane ka kam ba bha bad halor ka jingkut jingmut ban kyntiew ia ka pule puthi hapoh kane ka thain.

“Kane ka jingnoh synniang ym tang ba ka pynpaw halor ka bynta kaba iadei bad ka jingtei ia kane ka skul ka jong ngi, hynrei ruh ka pynpaw halor ka jingkongsan jong ka jingiatreilang hapdeng ki kompeni shimet bad ki tnat pule puthi na ka bynta ban btin lynti bad tei ia ka lawei ka ban wan,” pynpaw ki bor pyniaid skul.

Lah ban kdew ba ka Dalmia Bharat Cement Ltd la slem bha ka la don ia ka bynta kaba khraw ha ka ban khmih na ka bynta ka bha ka miat jong ki nongshong shnong.

Kane ka jingnoh synniang sha ka skul jong ka KJPSM, Thangskai ka pyni halor ka jingkut jingmut ban kyntiew ruh ia ka imlang ka sahlang nalor ka jingpyntreikam ia ki kam khaii pateng.