Ai jingiarap ka Sorkar T.2 klur lyngba ka MHAP sha ka Dr. Norman Tunnel Hospital

Syllad | The Rising MeghalayaMay 22, 2025

U Myntri Rangbah ka Jylla u Conrad K Sangma haka 21 tarik Jymmang u la aiti ia ka first instalment kaba T.1 klur kaba dei ka mang jingiarap kaba T.2 klur jong sorkar jylla lyngba ka Meghalaya Healthcare Advancement Policy (MHAP) sha ka Dr. Norman Tunnel Hospital, Jowai.

Ia ka T.1 klur kaba sah yn sa pyllait hadien ba la dep ban aiti ia ka utilization certificate halor ka jingpyndonkam ia kane ka jingiarap pisa kaba nyngkong.

Hapoh jong kane ka skhim ka sorkar ka la pynioh haduh T.10 klur sha ki santylli ki hospital ba la pyniaid da ki kynhun bapher bapher ka jylla.

Haba kren ha ka jingialang u Myntri Rangbah u la pynskhem halor ka jingkut jingmut jong ka sorkar ban ai ka jingiatreilang kaba neh slem bad ki hospital ba la pyniaid da ki kynhun Balang.

“Kane kam dei satia ka jingai jingiarap kaba tang shisien hynrei ka dei tang ka jingsdang ban bteng ia ka jingiatreilang kaba neh bad ki hospital jong ki kynhun Balang. Ka skhim ka long kaba iar, ki hospital ki lah ban shim hi ia ka rai halor ki jingdonkam ba kyrkieh jong ki bad ban pyndonkam ia kane ka pisa,” u la ong.

U Rev S Lamare uba la pyniaid ia kane ka jingialang ha ka jingkren u la pynpaw ka jingsngewnguh halor kane ka jingkyrshan bad bteng ban pan ia ka jingkyrshan lem ha kaba iadei bad ki jingtei kumjuh na ka bynta ka jaka pule nurse.

Katba ka Dr D Nongpluh Medical Superintendent ka la ban jur halor ka jingdonkam kyrkieh ban don ia ka Renal Dialysis Unit da kaba kdew halor ka jingkiew jong ki jait jingshitom ki bym iabit.

Na ka liang u Myntri Rangbah u la pynbna ruh ia ka jingthmu ban pynlong ia ka State Level Healthcare Conference ban tei ia ka jingiatreilang hapdeng ki hospital sorkar, ki hospital ba pyniaid da ki kynhun Balang bad baroh kiba don bynta ha ka liang ka kot ka khiah. “Ryngkat lang ngi dei ban iaid shakhmat ban iasam ia ki jingnang jingtip, ban weng ia ki jingeh bad ban ai ia ka jingshakri kaba kham bha,” u la bynrap.

Nalor kata u la pyntip ruh ba ki jingtuklar kiba neh ha ka liang ka koit ka khiah, kynthup ka jingpynleit jingmut kyrpang ban weng ia ka jingeh halor ka jingkhlad jong ki longkmie ha ka por ba kha khunlung ka la long kaba jop, ha kaba la lah ban pynduna ia kane ka jingiap da haduh 45%, kata kaba la ia ryngkat bad ka jingkheiñ kyllum ha ka ri baroh kawei.

“Kane ka jingjop ka dei khamtam namar ki sienjam ba la pyntreikam kum ka CM Safe Motherhood Scheme kaba pynthikna ban khmih bniah ia baroh ki longkmie kiba pun khun hapoh ka jylla,” ong u Conrad.

U la pyntip ruh ba ka sorkar ka la pyndonkam ia ki kor ki bor teknologi ban peitngor bad buddien ia kito ki longkmie ba pun khun kiba don ha ka jingma, kaba kynthup ia ka jingshim khia ha ka por kaba biang.