Ai jinghikai shna jingbam ka Jaintia Hills Development Society ha Mynkre

Syllad | The Rising MeghalayaNovember 27, 2021

Ka Jaintia Hills Development Society (JHDS) ryngkat ka jingïatreilang ka ophis District Social Welfare Officer, East Jaintia Hills District ka la pynlong ïaka jinghikai ba ar sngi iaki Slef Help Group (SHG) halor ka kam shna jingbam haka shnong Mynkre, East Jaintia Hills District.

Ka jingthmu jong kane ka jingai jinghikai kalong ban kyntiew ïaka ïoh ka kot jong ki Self-Help Group (SHG).

Ïaka jingai jinghikai la plie da ka District Social Welfare Officer East Jaintia Hills District ka Kong R. Passah haka jingïalang kaba la long haka shnong Mynkre ha ka jingiadonlang u Waheh shnong u Bah Sunny Bareh bad kiwei ki riew rangbah ka shnong.

U Ma Sunny Bareh haka jingkren ula kyntu bad ai mynsiem ïaki dkhot jong ki SHG ba kin shim khia bad ban pyndonkam hok ïaki jinghikai ba ki la ïoh bad ula ai khublei kyrpang ruh ïaka JHDS bad ka tnad Social Welfare kiba la shim khia ban pynlong kum kine ki jingai jinghikai na ka bynta ka jingmyntoi kiba bun.

Ka District Social Welfare Officer East Jaintia Hills ka Kong R Passah haka jingkren ka la kyntu ïaki nongïashim bynta ban pynleit jingmut ïa kano kano ka kam ba ki trei bad ba kim dei ban kyrkieh haka jingïoh nong hynrei ban long kiba ïaishah.

Ka Kong R. Passah ka la ai jingmut ïaki kynhun jong ki longkmie ba kidei ban pyndonkam ïa ki soh ki pai ba mih nala ka jong ka shnong namar ba ki long kiba bun ïaki vitamin bad ki nutrient.

Ïaka jingbatai halor ka hok jong ki kynthei la batai da ka Kong H. Pale ka nongsaid ka One Stop Centre Khliehriat kaba la batai shai ïa kiba bun ki aiñ kiba ïarap ban ïada ïaki kynthei na ki jingshah thombor pyrshah ïaki kynthei khynnah (Domestic Violence and Crime against Women).

Ka la kyntu jur ïaki longkmie ba kim dei ban sheptieng haba ki ïa kynduh kum kine ki jingeh hynrei kidei ban wan shakhmat namar ka don ka aiñ ban ïada ïaki.

Ïaka jingïalang la pynïaid da u Coordinator ka JHDS u Bah Denis Kurkalang uba la maitphang ruh ka ka jingthmu jong kane ka prokram bad la ïoh ruh ki kyntien ai khublei na u Bah Remigius Pyngrope uba long u Cluster Coordinator ka JHDS.