Ai jinghikai ka tnad Fishery halor ka jingpynkylla fish sanctuary iaka Wah Myntang

Syllad | The Rising MeghalayaAugust 22, 2023

Ka tnad Fishery West Jaintia Hills District haka sngi Nyngkong kala hiar sha ka Shnong Khatkasla ban pynshai sha ki nongshong Shnong ha kaba iadei bad ka Fish Sanctuary ne ka jaka buh ban ri dohkha.

Ha kane ka sngi la donlang u B. Shylla Fishery Supervisor, u R Lytan Programme Manager bad u M Nowa Multi Service Provider, ki nongialam Shnong bad ki nongshong Shnong.

U Waheh Shnong Khatkasla u Nangeibormi Lamare haka jingkren ula iathuh ban na ka liang ka Shnong ka la dep ban ai da ka dorkhat sha u Superintendent jong ka tnad Fisheries ban pynneh pynsah iaka wah Myntang naduh Khad Ripiang haduh Thwai Jri kum shibynta ban iada iaki dohum dohwah.

Ula kyntu iaki nongshong Shnong ban don ka mynsiem iatreilang bad ka sorkar khnang ban lah ban iada iaka wah Myntang bad ba kan long kum ka Fish Sanctuaries.

U R Lytan Programme Manager ula pynpaw ka jingknem ba ka Shnong Khatkasla kadei kawei kaba la iaid shakhmat iaka Fish Sanctuary ban pynneh pynsah iaki dohum dohwah bad ula ong ba kan sa poi ka por ha kawei ka sngi kan khring iaki paidbah ban wan peitkai ia kane ka jaka bad kan long ruh kum ka Tourist Spot ka ban plie lad iaka kamai kajih jong ki nongshnong Shnong.

U B Shylla Fishery Supervisor ula ong sngewtynnad ban iatreilang bad ki waheh Shnong jong ka Khatkasla kiba iohi jngai iaka jingdonkam ban pynneh pynsah iaki dohum dohwah.

Ki dohkha kiba don ha kane ka wah kidei ki dohkha trai Shnong ki bym donkam ban rah pateng na kiwei ki jaka bad kaba donkam mynta ka long kadei tang ban pynneh pynsah iaki.

Ula kyntu ruh iaki nongialam Shnong ban buh da ki signboard jingmaham namar bunsien hi ka mynsiem lalot kadei ka jingduhnong iaka pateng ban wan. Ula kyntu iaki nongshnong Shnong ban iatreilang khnang ban miat ban bha ka Fish Sanctuary.