Ai jinghikai ka Pynshlurlang VO halor ka jingktah u khawyiang bad kiwei ki jingdih pynbuaid

Syllad | The Rising MeghalayaMarch 6, 2021

Ka Shnong Pamrapaithlu haka sngi Thohdieng kala pynlong iaka jingai jinghikai halor ka jingktah jingdih kyiad bad kiwei ki jingdih ba pynbuaid.

Ia kane ka program la pyniaid da ka Pynshlurlang Village Organisation, Pamrapaithlu ha phyllaw ka skul Govt L.P School Pamrapaithlu.

Ka Kong Lakshmi Rymbai ba long ruh ka Chairperson Ka Village Organisation kala pyniaid iaka jingialang haka jingiadonlang ruh u Waheh Shnong u ma Leningstar Rymbai ha ryngkat u Dr. F Lamin kum u riewshemphang.

U Dr. Lamin ula ong ba ka jingkyrni iaka kyiad bad ki jingdih pynbuaid ba bunjait ka ktah ym tang ialade hynrei ka wanrah ka jingktah iaka jongshongsuk shongsain ka iing ka sem, ka imlang sahlang bad ka shnong ka thaw hi baroh kawei.

“Ka jingkiew ka jingiap jong ki briew ha kine ki sngi ka dei ruh na ka jingdih kyiad kaba la wanrah ia shibun kiwei pat ki jingpang naduh ka jingkiew ka jingpang BP, jingsniew tor ha u briew u ba kyrni ban dih kyiad bad haka juh ka por ka wanrah ruh iaka jinghiar ka ioh ka kot ka dei ha ki longing longsem ruh,” la ong u Dr Lamin

U Dr. Lamin u la kyntu ia ki paidbah khamtam ia ki khun samla ba kin kiar na ki jingmlien ba sniew  khnang ba kin jop haka jingim.

U Waheh Shnong Ma Leningstar Rymbai u la ong ban pynduh jait ia ka jingkyrni haka jingdih iaki jingdih pynbuaid ka long tang da kaba iatreilang na baroh ki liang ba kynthup na duh ki seng samla shnong, seng longkmie, bor pulit bad kiwei kiwei. Kaba kongsan kalong ba ki kmie ki kpa ki dei ban hikai bad sneng ban kraw bad ban iasyllok bad ki khun ki kti naduh ba dangrit halor ka jingsniew ki dih pynbuaid.