Ai jinghikai ka HWWDO ha ka shnong Saphai ban iakhun iaka shong kha khynnah

Syllad | The Rising MeghalayaApril 24, 2021

Ka Hynniewtrep Women Welfare & Development Organization (HWW&DO) haka sngi Thohdieng kala pynlong ïaka jinghikai ban pynsngewthuh paidbah halor ka jingsniew ka shongkha khynnah bad ka jingshah thombor ki kynthei khynnah haka shnong Saphai, West Jaintia Hills District

Ïaka jiinghikai ha Community Hall ka shnong Saphai kaba la wan ïashim bynta ki khynnah skul naki skul bapher ka shnong bad ki nongshong shnong ka Saphai.

U Dr W. Dkhar ula pynshai ba ka jingshongkha khynnah khlem pat dei rta ka wanrah ïaka longiing longsem kaba jot kaba pra. Ula ong ba ka jingshongkha khynnah ka ktah ha baroh ki liang ia u/ka khynnah naduh ka rukom pyrkhat pyrdain, ka jingthud haka pule ka puthi bad ka ktah ïaka koit ka khiah ki khynnah. Ki khynnah ki dei ka lawei ka imlang ka sahlang bad lada ki duh noh kloi iaka jinglong khynnah bad kit iaka lyngkor jong u rangbah khlem dei por kan buh jingeh iaka imlang sahlang.

Ka shongkha khynnah kadei kaba beaiñ bad ban iakhun pyrshah ia ka jingshong kha khynnah, kumta ki khynnah skul, ki kmie ki kpa bad ki nonghikai kumjuh ki dei ban pynsngewthuh bad iasyllok bad ki khynnah halor ka jingktah ka shongkha khynnah ban lait na ki jingeh hadien habud.

Ka Kong W Ksoo Superintendent Children’s Home Boys, Jowai kaba la ai jinghikai halor ka jingshah thombor bad jingshah pynïap dusmon ki kynthei khynnah. Kala ong ba ki kam sniew, ki kam thombor iaki kynthei khynnah ka jia namar ba la jakhlia ka rukom pyrkhat u/ka briew, hynrei lada pynmlien ban leh bad ban peit ia kino kino ki kam kiba bha bad ki nuksa ba bha kine baroh lah ban tem bad iakhun pyrshah.

Ka pynshlur iaki khynnah ban minot haka pule ka puthi bad kiar na ka jingmlien ba sniew ban jop haka jingim.

Nalor ki riew shemphang la ïoh ruh ka jingkren na u Waheh Shnong u Bah A. Bareh, u Incharge ka Saphai Police Outpost u Bah R. Syngkon, u Adviser ka HWW&DO u Bah C. Sungoh bad na ka President ka Kong O. Suchiang.

Baroh ki nongkren ki la kyntu ïaki khynnah skul bad nongshong shnong ban shimkhia bad pylleit jingmut halor ki jingai jingmut bapher bapher ki ban tei ïaka imlang sahlang ha ka jingim briew na bynta ka jingshngaiñ ka jingkiew shaphrang bad shibun ki jingmyntoi.