Ai jingbit ka DC iaki nongrep ban leit peit lyngkha rep ha East Khasi Hills District

Syllad | The Rising MeghalayaMay 25, 2021

Ka Deputy Commissioner, East Khasi Hills District, Kong Isawanda Laloo, IAS haka sngi ba Ar kala ai jingbit iaki nongrep ban leit pet bad sumar iaki lyngkha rep jong ki haka por ba pynjari iaki kurphiw ha District baroh kawei.

Ia kane hukum la pynmih khnang ba ki paidbah nongrep jong ki shnong bapher hapoh East Khasi Hills District kin ïoh ban leit peit bad sumar ïa ki mar rep ha la ki jong ki jong ki lum bad lyngkha rep, ha ka por ba pynjari ïa ka kurphiw:

Ka hukum ka ong ba ki nongrep ki lah ban pyntip lyngba ki Rangbah Shnong/CCMT sha ki BDO shaphang ka jingdonkam.

Ki Block Development Officer, hadien ka jingpyntikna, kin ai ïa ki Pass ne shah kyrpang na ka bynta ki nongrep ba la pynithuh lyngba ki Rangbah Shnong/CCMT, khnang ba kin lah ban leit peit leit sumar ïa ki mar rep tang sha la ki jong ki lum bad lyngkha rep ka ban trei kam naduh 5 baje mynstep haduh 3 baje nohphai sngi.

Ïa ki Car Pass na ka bynta ki nongrep kiba don ïa ki jaka rep jngai na la shnong bad ki bym lah ban poi da kaba shu ïaid kjat, lah ban aplai na ka ophis jong ki Block Development Officer jong ki shnong ba dei peit.

Baroh ki nongrep ki dei ban bud pyrkhing ïa ki kyndon ba la pynmih da ka tnat ka koit ka khiah na ka por sha ka por.

Kita ki long:
a) ba ki dei ban deng ïa ki mask ha ka por ba ki leit sha ki jaka rep.
b) ba ki dei ban pynïajngai ïalade na kiwei pat ki para nongrep la kumno kumno 2 mitar lane 6 phut.
c) ba ki dei ban pynkhuid pynsuba ïalade, ha shwa ban rung ha ïing hadien ba ki la wan phai na ki jaka rep.
d) ban ïatrei lang bad ki jingpynïaid jong ki Rangbah Shnong/CCMT bad jong ki BDO.
e) kino kino kiba shitmet lane jyrhoh lane don kino kino ki dak jingpang, ym bit ban mih sha ki jaka rep.
f) ym shah ban mih na ki jaka ba dei ki Containment Zone.

Ki BDO/IC ba dei peit ïa ki shnong ba don ki jaka rep, ha ryngkat ka jingïatreilang bad ki Rangbah Shnong/ CCMT, ki dei ban pyntikna ïa ka jingbud pyrkhing ïa ki kyndon bad jingbthah jong ka Sorkar lyngba ka tnat ka Koit ka Khiah, khnang ban lah ban ïada na ka jingsaphriang jong une u khñiang jingpang.
Ki BDO bad ki pulit ba dei peit ïa ki shnong ba don ki jaka rep, ki dei ban khmih tikna ban ym don kiba shim kabu lane sngewthuh bakla ia kane ka hukum (order) kaba kyrpang tang na ka bynta ki nongrep kiba leit rep sha ki shnong bapher bapher.
Kino kino kiba shim kabu lane kiba pyndonkam bakla ïa kane ka Order, kin hap hapoh ka jingpynshitom katkum ka aiñ.