Ai burom u PM Modi ia u Bah Brian Kharpran halor ka jingshem ia ki 1700 tylli ki krem ha ka jingkren Mann Ki Baat

Syllad | The Rising MeghalayaAugust 27, 2023

U Myntri Rangbahduh ka Ri, u Narendra Modi ha ka jingkren ha ka bynta jong ka Mann ki Baat kaba 104 mynta ka sngi U Blei u la pynpaw ha kaba iadei bad ka jingdon jong ka krem kaba jrong bad jylliew tam ha ka jylla Meghalaya bad pyrto ia u nongrung krem ba pawkhmat ka jylla bad ka ri u Bah Brian Daly Kharpran uba la trei shitom ban wad bniah ha kaba iadei bad ka jingdon jong ki krem ki roh ha ka jylla bad kaba la iarap ban pynioh jaka ia ka Meghalaya hapoh ka map.

U PM u la ong ruh ba u Bah Brian u dei u briew uba don ka jingsngewtynnad bad ka jingangnud ban tip bad wad bniah shaphang ki krem ki kroh, bad ma u ha ryngkat ka kynhun ki la lapdien haduh palat 1700 tylli ki krem bad kaba la buh ruh ia ka jylla Meghalaya ha ka map kaba iadei bad ka jingdon jong ki krem ki kroh ha ka pyrthei ne ka ‘World Cave Map.”

U Bah Kharpran u la sdang ia ka kam rung krem ha ka snem 1964, kata ha ka por ba u dang dei tang u samla pule high school. Hynrei, ha  u snem 1990, ula seng ia ka kynhun ha ryngkat ki paralok bad sdang ban pynlong ka jingwad jingtip halor ki krem ki kroh ki bym pat ju don ba rung kiba don hapoh ka Jylla.

Shuh shuh u Bah Brian ha ryngkat ka kynhun jng u kila lapdien bad  rung haduh 1700 tylli ki krem ha kaba la pynrung ruh ia ki hapoh ka ‘World Cave Map.’

Na ka liang u PM Modi u la ong ruh ba une u Bah Brian ha ryngkat ka kynhun jong u ki la lum jingtip ruh ha kaba iadei bad ki jingdon jingsat hapoh ki krem ki kroh kiba ki la leit ban rung ia kiba ym ju lap koit sha kino kino ki jaka jong ka pyrthei.