Yn pynshitom tyngeh ia kiba pynkheiñ ïaki kyndon COVID-19: DC Khliehriat

Syllad | The Rising MeghalayaApril 29, 2021

U Deputy Commissioner, East Jaintia Hills District u Bah E Kharmalki u pynbna paidbah ba u khniang jingpang coronavirus ula pur sted bha hapoh ka Ri India bad lada ki paidbah kim bud ryntih iaki adong adit bala pynmih na ka tnad Ka Koit Ka Khiah ka Sorkar Meghalaya kan buh jingeh iaka district bad ka jylla baroh kawei.

Kumta ban pynjari iaki kyndon bala pynbna ka sorkar, la bthah ia baroh ki Nongshnong Shnong hapoh ka East Jaintia Hills District kaba kynthup ia ki khyllung khynnah ba ki dei ban pyndonkam da ka mask man la ka por, ban sait bha ki kti man ka por, ban pynia jngai iwei na iwei pat bad kiar na ki jaka ba bun briew.

U Deputy Commissioner ula pynmih da ka hukum bad lada lap ia uno uno ne kino kino ki briew kiba leh pyrshah yn pynshitom kat kum ka ain.

La bthah ruh ia ki Bor Shnong, ki VDP bad kiwei kiwei ki seng ba kin long kiba peitngor bha hapoh shnong hapoh thaw ba ym dei ban don mano mano ba pynkhien ia kine ki jinghikai.

Shuh shuh, u la bthah ia baroh ki Nongshong Shnong ka Distrik ba dei ban long kiba phikir bha khnang ban lah ban tehlakam ia une khniang jingpang ba shyrkhei.