85 tylli ki mukotduma pension la bishar ha ka Pension Adalat

Syllad | The Rising MeghalayaJune 21, 2025

U Principal Accountant General (A&E), Meghalaya, Shillong, ryngkat ka jingiatreilang bad ka Finance (Pension Cell) Department ka sorkar Meghalaya ha ka 19 tarik Jylliew 2025 ki la lah ban pynlong ia ka Pension Adalat kaba jop ha Basic Training Centre, Malki, Shillong.

Kane ka sienjam ka thmu ban weng bad pynbeit ia ki jingeh kiba la slem bha kiba iadei bad ka pension jong ki nongtrei sorkar ba la shongthait ha ka rukom kaba la buh por bad kaba shai.

Ha kane ka Adalat la shim haduh 85 tylli ki mukotduma pension kiba la sahteng la slem bha na ka bynta ban bishar bniah. Ha kane ka sngi la wan iashim bynta da ki Drawing and Disbursing Officer (DDOs), ki nongioh pension bad ki ophisar kiba dei peit ia ka jingpyntreikam ia ka pension. La bishar bniah ia kawei pa kawei ka mukotduma, bad la pynshisha ia ki kot ki sla kiba iadei ha ka jingiadon lang ki nongiashim bynta kiba don bynta.

Ka Pension Adalat ka long kum ka rynsan ban iamir jingmut ba laitluid bad ban pynbeit mardor ia ki katto katne ki mukotduma kiba jyrwit jyrwat. La ai jingmut ruh sha ki heh ophis ka Tnad Finance bad DDO halor ka jingpynkylla bad pyntreikam hok ia ki kyndon ba iadei bad ki kyndon Pension. Ia ki katto katne ki mukotduma kiba la sahteng khlem lah pynbeit mynta la lah ban pynbeit noh ha kane ka Adalat.

Hynrei, la lap ruh ha ki katto katne ki khep ba wat hapdeng ka jingbuddien kaba bunsien da ka Tnad Finance (Pension Cell) bad ki DDO bapher bapher, hynrei ym shym la lah ban lap ia u nongdawa ba dei hok. Ia kine ki mukotduma la shim kum kiba la pynkut noh, kata katkum ka jingmynjur ba pura da ka Tnad Finance.

Ka mat ba kongsan ba la pynpaw ha ka por jong ka Adalat ka long halor ka jingpynslem ban pynbeit ia ka pension namar ka jingbym aiti ia ki nomination form da ki nongtrei ha ka por ba ki dang shakri ha ka kam. Ka jingbym don ia kine ki kot ki sla ba kongsan ka la wanrah ia ki jingeh kiba lah ban kiar ha kaba pyntreikam ia ki jingdawa pension.

U Principal Accountant General u la ban jur ia ka jingdonkam kyrkieh ban shim ia ki lad jingiada bad aijingmut ba ka Tnad Finance kan pynmih ia ki jingbthah sha baroh ki DDO ban pynthikna ba dei ban lum ia ki nomination form na baroh ki nongtrei sorkar hashwa ba kin sa shongthait.