85 run jop ka Efty Utd iaka Moodymmai haka cricket ka WJHDCA

Syllad | The Rising MeghalayaApril 21, 2023

Ka Efty United XI Mynso kala jop da 85 run ia ka  Moodymmai Cricket Club haka Open to All Cricket Tournament kaba pyniaid da ka West Jaintia Hills District Cricket Association (WJHDCA) kaba long ha madan Khliehtyrshi haka sngi Palei.

Ka Efty Utd kaba jop iaka toss kala tied shuwa ban kamai 263/8 na ka 35 over.

U Sylvester Mylliempdah ula kylla long u namtam ha kane ka jingiakhun hadien ba marwei ula khyrwit 127 run naka 83 ball bad ula ioh khur ruh shi wicket kaba la biang pura ia u ban khur iaka nam man of the match. U Kitboklang Lyngdoh ula ioh 35 run, u Daymen Shullai 26 run.

Ki nongkawang ball ka Moodymmai Cricket Club kiba ioh khur wicket ki dei u Ribok Hynniewta, Teimi Passah bad Heimonlang Lyngdoh kiba la khur mar ar wicket.

Haba beh iaka thong kaba 264, ka Moodymmai kala ioh tang 178/10 na ka 32.3 over. U Levester Phawa 50 run bad u Daowan Passah 38 run ki dei ki ar ngut kiba la synniang sha ka jingkamai run ka Moodymmai.

Kiwei pat ki nongkawang ball ka Efty kiba khur wicket ki dei u Eleazar C Dkhar (3 wicket) bad Kitboklang Lyngdoh (2 wicket).