8 tarik yn shim rai khatduh halor ka khlaw ha Thadmynri ong ka Dorbar Shnong Namdong

Syllad | The Rising MeghalayaJanuary 6, 2021

Ka Dorbar Shnong Namdong kaba la long ha ka 28^th Nohprah 2020 ka la shim ia ka rai ba khatduh ban pan jingshai na ka JHADC Jowai lada kan pyndon kam lane kan ieh noh ia ka Reserved Forest kaba kyrteng Thadmynri (Raij Namdong Elaka Nongjngi) kaba ka dorbar shnong Namdong ka la ai sngewbha sha ka JHADC ban thung dieng bad ban sumar ia ki dieng sal ha kane ka khlaw.

“Namar ka jingleh klet jong ka District Council ia ka shnong Namdong bad ka jingai lad ia ki riew shimet ban thangrnga ban khlong maw lein bad ban rep synsar ha kane ka khlaw, ka Dorbar Shnong ka la khot ia u Chief Forest Officer jong ka JHADC Jowai ban wan pynshai sha ki paidbah nongshong shnong ha ka 08^th Kyllalyngkot – 2021. Ha kane ka sngi ka Dorbar Shnong kan shim ia ka rai ba khatduh lada kan weng ne kan bteng ia ka soskular ha pdeng ka shnong bad ka District Council kaba la ia soi lang ha ka 05^th July (Naitung) 1985 lyngba ki nongkitkam shnong ka shnong Namdong naduh u Rangbah Shnong Secretary Shnong bad u Chairman Shnong Namdong bad na ka liang jong ka ophis la soi da u Chief Forest Officer jong ka JHADC,” la ong u ma Elias Susngi, Waheh Raij Namdong Elaka Nongjngi.

U ma Elias ula ong shuh shuh “Ka shnong kala rai lang ban ap ia ka por bad ka jingpynshai na u khlieh jong ka tnat khlaw jong ka council bad ha kane ka sngi na ka liang jong ki nongshong shnong kin shim ia ka rai jong u paidbah lada kin bteng ne weng ia ka (agreement) hadien ka jingpynshai na ka liang ka ophis.

Halor kane ka bynta lada u Chief Forest Officer jong ka JHADC um lah ban wan ha kane ka sngi ban ai jingpynshai sha ki paidbah ka shnong kan weng ia ka soskular (agreement) ba la ia kut ha u snem 1985.”

“Ngi na ka liang jong ka shnong ngin sumar hi ia kane ka khlaw bad ngin pyndonkam ia ka kat kum ka jingibit jong ka shnong khamtam eh ban pynurlong ia ka jingthrang jong ka shnong ban pynkylla biang ia kane ka jaka kum ka Reserved Forest bad ban pynduh jait ia ka jingpom pathar ia ki dieng, ka jingrep synsar kaba la pynduh jait ai ka jingheh jingsan jong ki dieng ki siej,” la ong u ma Elias.