7 snem shah rai set phatok u runar ba leh beijot ia ka khynnah

Syllad | The Rising MeghalayaMay 29, 2025

Ka Iingkashari Special Judge (POCSO) ka East Khasi Hills, ka Kong MK Lyngdoh ka la pynbna ia ka rai pynrem pyrshah ia u runar uba donkti ha kaba leh beijot ia kawei ka khynnah da kaba set phatok haduh 7 snem kynthih.

U Superintendent of Police ka East Khasi Hills, u Bah Vivek Syiem u pyntip ba une u runar uba kyrteng u Strongman Kharbani u dei uba la shah kem ha ki pulit ka Mawsynram halor kane ka kam bymman kaba u la leh ha u snem 2019, ha kaba u la shah pynngat hapoh ka kyndon 5(m)(n)/6 jong ka POCSO Act.

Ia kane ka rai pynrem ka Iingkashari ka la pynmih ha ka 26 tarik Jymmang ha kaba la pynngat ia u hapoh ka kyndon 10 jong ka ka POCSO Act da kaba hukum ban set phatok 7 snem ha ryngkat ka kuna kaba T.50,000 bad ba un hap ban shong tam sa hynriew bnai lada um lah ban siew ia kane ka kuna.